Hiar jurip u EM bad ki MDC ha khappud KHADC bad GHADC

Ha ka 12 tarik mynta u bnai, u Executive Member (EM) ba peit ia ka khyndew bad ka shyiap, u Bah Powell Sohkhlet, ryngkat u MDC ka Rambrai, u Bah Lurshai Kharbani, u MDC ka Nongstoin, u Dr. Juristman Iawphniaw, u Sirdar ka Hima Nonglang, bad kiwei pat ki nongialam ka Hima, ki la leit ban jurip ia u pud hapdeng ka KHADC bad GHADC. Kane ka jingleit jurip ka la bud hadien ka jingjia kaba la leh da ka GSU (Garo Students’ Union) bad ki briew kiba la kam ba ki dei na GHADC, kiba la pynpra ia ki mawpud jong ka kur Ñianglang ha Mawkuru, kaba hap hapoh u pud ka Hima Nonglang.

Ia kane ka jingleit jurip la pynlong ryngkat ka jingdonlang u EAC ka Mawshynrut Civil Sub Division bad u SDPO ka Mawshynrut, haduh ka jaka ba iaid ka wah Umpait, kaba don ruh ka jingkieng kaba pyniakhlad ia ka East Garo Hills bad West Khasi Hills. Hadien ba ki la jurip ia kine ki jaka ba don ha khappud, u EM bad ka kynhun ki la leit ruh ban jurip sha ka jaka kaba la kynnoh ba la pynpra ia ki mawpud da ka GSU.

Haba kren sha ki nongthoh khubor hadien ka jingjurip, u EM u la ong ba kane ka jingleit jurip ka dei kaba la bthah da u CEM ka KHADC, u Bah Shemborlang Rynjah, hadien ka jingpyntip u MDC ka Rambrai. U Bah Powell u la pynrem jur ia ki kam jong ki kynhun na Garo Hills, da kaba ong ba u mawpud ba la pynpra da ka GSU bad GHADC um dei u mawpud jong ka KHADC, hynrei u dei u mawpud jong ka kur Ñianglang, ba la buh ban iasam ia ka jaka jong ka Kur. U la ong ruh ba kane ka jaka, ka dang jngai na u pud hapdeng ka West Khasi Hills bad East Garo Hills, bad ba ki kot ki sla ki sakhi bad pynshisha ba kane ka jaka ka dei jong ka Hima Nonglang Sirdarship.