Donkam ka jingiadei bad ki lad jngohkai pyrthei ban pynneh bad kyntiew ïa ki riti dustur bad ka jingitynnad ka mariang

Ka Parliamentary Standing Committee on Transport, Tourism bad Culture ba lamkhmat da Sanjay Kumar Jha uba dei ruh u MP hynne ka sngi ka la leit kynduh ïa u Lat ka Jylla Meghalaya ha Raj Bhavan Shillong. Ia kane ka kynhun la synran da ka Sudha Murty kaba dei ruh ka Philanthropist bad ka nongthoh kot ba pawnam. Ïa kane ka Committee la pdiang sngewbha da u Lat ka Jylla u Chandrashekhar H. Vijayashankar ha kaba u la pynpaw ïa ka kolshor ba riewspah jong ka Meghalaya bad ula pynpaw ïa ka jingdonkam ka jingiadei bad ki lad jngohkai pyrthei kiba lah ban pynneh bad kyntiew ïa ki riti dustur ba kyrpang jong ka Jylla bad ka jingitynnad jong ka mariang.

Ka Committee ka la iakren ia ki projek ba dang iaid shakhmat ban pynbha ia ka surok bad ka lynti Rel hapdeng ka Meghalaya bad ki Jylla ba marjan, da kaba ban jur ia ka jingdonkam ban don ka jingpyniasoh ha baroh ban kyntiew ia ka khaii pateng bad ka kam jngohkai pyrthei. Ka Sudha Murty ka la ai khublei ïa ka jingpyrshang jong ka Jylla ban pynïasohlang ïa ki rukom jngohkai pyrthei kiba pynshong nongrim ha ka imlang sahlang, bad ka la tyrwa ban ïatreilang bad ki seng ai jingïarap ban kyrshan ïa ki nongtrei kti ba thaiñ jingthain bad ki jingthmu ban pynneh pynsah.

Ka la ïaroh ïa ka jinglong jingman jong ki rukom shna dur jong ka Meghalaya bad ka la khot ïa ki prokram pynroi jingtbit ba la thmu ha ki shnong nongkyndong ban pynthikna ba ka jingmyntoi ha ka liang ka ioh ka kot jong ka kam jngohkai pyrthei kan poi sha man la ki longïing.