Pynkup burom ka NEHU ia u Prof David R Syiemlieh

Ka North-Eastern Hill University (NEHU), Shillong, ka la pynlong ïa ka prokram hynne ka sngi, kum ka jingpyndon burom ïa u Prof David R Syiemlieh uba la ioh ia ka Padma Shri 2025.  Ha kane ka prokram la wan ïashimbynta ki scolar ka University, ki samla pule barim, ki nonghikai, bad ki nongkyrshan kiba la ïalum lang ban ai burom ïa u riewstad bapawnam ha ka liang ka jingpule bad ka jingsynshar. Ka Prof. Cecile A. Mawlong, ka Dean jong ka School of Social Sciences, kala kdew ia ki jingjop jong u Prof. Syiemlieh ki “krenshibun” shaphang ka jingaiti jongu ha ka jingnang jingstad bad ba watla u la poi sha ka tduh jong ka jingjop, u dang long uba don nongrim, uba sbun, bad uba ïadei bha bad ki tynrai jongu. Kala iaroh ia ki jingnoh synniang kiba khraw jongu ha ka jingthoh histori jong ka thain shatei lam mihngi jong ka ri India, khamtam eh jong ki thain Khasi bad Jaintia. U Prof. Shobhan N. Lamare, Head ka tnad History bad u samla pule barim jong u Prof. Syiemlieh, ula batai ba u Prof. Syiemlieh u long kum “ka duriaw kaba heh jong ka jingtip” katba ka jingling rit mynsiem jongu kala iehnoh ia ka jingkynmaw kaba jylliew ha baroh kiba ithuh ia u.

U Professor jong ka University, u Prof. Saha ula iaroh ia u Prof. Syiemlieh kum u riewstad uba la wanrah ia ka sur, ki jinglong bad ka jingthmu jongka thain shatei lam mihngi sha ki rynsan jong ka ri bad ka pyrthei. “Um dei tang u nongthoh histori, hynrei u nongsumar ïa ki histori ba jylliew jong ka thaiñ,” ong u Prof. Saha. Ka Prof. S. M. Sungoh, ka Vice-Chancellor Incharge, kala pynpaw ïa ki jingnoh synñiang ba bun jait jong u Prof. Syiemlieh bad ki jingjop jongu ki long ka jingpynpaw ym tang ia ka jingtbit shimet hynrei ia ka bor jong ka jinglongrit mynsiem, ka jingnang jingstad bad ka jingshakri.  “Ka kam jong ka jingim jong phi,” kala ong, “kam shym la pynshai tang ïa ki lynti pule hynrei ka la wanrah ruh ïa ka jingsarong kaba khraw ïa ki briew jong ka Meghalaya bad ka thaiñ Shatei Lam Mihngi.”U Prof. David R. Syiemlieh ula pynpaw ïa ka jingsngewnguh kaba khraw ïa ki tnad skul, kolej bad ki jaka treikam kiba la saiñdur ïa ka jingïaid lynti jongu— ka Dr.Graham’s Home, ha Kalimpong; St. Edmund’s College Shillong bad ka NEHU.  Ha kaba iadei bad ki sngi jongu ha ka UPSC, ula kren shaphang ki jingling ba u bat, khamtam eh ia ka jingaiti jongu ban kynthup lang bad ban ithuh ia ki nongtrei ba kyrshan. Ka rukom kaba la buh kyrpang kaba ula sdang ha ka por ba u dang don ha ka UPSC ka long ban khot ia ki nongtrei, ki peon, ki steno bad ki secretary ban iadih sha ha ka kamra iakynduh ha ka sngi Krismas — ka jinglehkaba bun ki dang kynmaw sngewbha haduh kine ki sngi.

U Prof. Syiemlieh ula ai burom ïa ka jingioh pdiang ia ka Padma Shri jongu ha ka bynta kaba khraw ha ka NEHU, ha kaba ka kam jongu kum u nonghikai bad nongpynïaid kala roi bha. Ula ai khublei ia ki skolar jong u, ha kaba bun na ki kila nangroi sha ki riewstad bapawnam— kynthup ia u Prof. Shobhan Lamare bad ula pynpaw ia ka jingsngew sarong ia ki jingjop jong ki. Da ka jingsngewrit, ula kynmaw ia ki nonghikai bad ki paralok jong u — u Prof. UJ.B. Bhattacharjee, u Prof. Imdad Hussein bad u Prof. Milton Sangma. Ula pynkut da kaba ïathuh ba wat ha ka por ba u long kum u khlieh jongka UPSC, ka jingieit jongu ïa ka histori kam shym la duna satia, kumba la pynshisha da ka jingpynmih jong u ïa lai tylli ki kot ha ka por ba u don ha ka kam UPSC kum u Chairman.