Kylla wah ki surok National Highway, sah kut ki kali ba shlei um

Ka jingneh u slap u ba la hap naduh mynstep jong ka 30 tarik Jymmang, ka la wanrah ia ka jingsyrtok ki paidbah nongleit nongwan, ki khynnah skul tang namar ka jingshlei um ha kiba bun tylli ki bynta jong ka thaiñ Byrnihat terter sha Jorabat bad wat ka jingshlei um ha u surok bah NH-06 bad NH-27 ha Ri Bhoi District. Ha kane ka jingshlei um kaba la pynsyrtok bha ka la jia ha ka skul St. Judes Secondary School ha Umpher Byrnihat, kaba sa shisien ka la shah ktah biang na ka jingkiew kynsan ka um bad rung sha ki kamra class tad haduh ba ki bor pyniaid skul ki la hap ban pynbna shuti noh ia kane ka skul ha kaba ka um ka la pynjulor ruh shibynta ki bynta jong kane ka skul, nalor ka skul ka um ka ktah ruh ia ka hostel bad ka iingmane kaba don ha kane ka shnong Umpher.

La sakhi ruh, ba ha kane ka jingshlei um kaba la tap ruh ia ka surok National Highway 06 bad National Highway 27, kata terter naduh 12 Mer, 13 Mer shaduh Jorabat ka la wanrah ia ka jingdheng kali kaba jur haduh mynta janmiet, ka jingshlei um ka la ktah ruh ia ka leit ka wan ha kaba la sakhi ia ka jingper jong ki kali hapdeng ka um katba ki dang pyrshang ban jam sha shilliang u surok, ka jingshlei um ka la ktah ruh ia ki dukan bapher bapher kiba don ha ka thaiñ Jorabat.

Katkum ka jingioh lum khubor kylleng ka Ri Bhoi District ha kaba ia dei bad ka jingiai bteng ban hap u slap khlem sangeh mynta ka sngi, la ioh jingtip ba ka la don ka jingtwa khyndew ruh ha ka jaka kaba hap hapoh ka North Eastern Police Academy (NEPA) Umsaw, ka jingtwa ka bynta jong u surok bah National Highway 06 ha Shangbangla. Tad haduh ba thoh ia kane ka khubor ym shem la don kano kano ka jingjia ba sngewsih.