T.3 lak shisngi ka bai kiad u VC ka NLU, 2 bnai pan por ka sorkar ban tohkit

Ka Sorkar Jylla ka la kular ban thung da ka jingtohkit halor ki jingkynnoh treikam bymhok bad pyniaid kam bakla u Vice Chancellor ka National Law University, Meghalaya (NLUM), u Prof Indrajit Dube. Ia kane la pyntip da u General Secretary ka Khasi Students’ Union (KSU) u samla Donald V Thabah hadien ka jingleit ai ti da ka jingujor pyrshah ia u VC ka NLUM sha ka Myntri ba khmih ia ka tnad Ain (Law) ka Kong Ampareen Lyngdoh. Ka KSU ka la leit ujor pyrshah ïa u VC ka NLU hadien baka seng kala ioh pdiang iaka kaiphod RTI ha kaba la lap iaka jingpyndonkam bakla ia ka pisa da u Vice Chancellor nalor shibun ki jingleh bym hok ha ka thungkam thungjam. Haba kren sha ki pathai khubor u samla Donald u la ong ba ka Myntri ka tnat Ain kala pan por 2 bnai ban pynlong ia ka jingtohkit khnang ban ioh aiti iaka kaiphod sha ka Governing Council bad ka Executive Committee jong ka NLU. U Samla Donald u la iathuh ki dkhot jong ka Governing Council bad ka Executive Committee ka NLU ki kynthup ia ki Judge ka High Court ba kin shong bishar ia baroh ki jingujor bala aiti daka KSU. “Ha ka jingshisha ngi dawa ban wengkam noh ia u Vice Chancellor hynrei la iohi ba ki don katto katne ki jingeh halor ka jingweng kami a u tangba kila kular ba kin sa aiti ia ki jingshem jong ka jingtohkit sha ka Finance Committee bad ka Executive Committee ban kin sa leh eiei halor kane” la ong u samla Donald.

U samla Donald u la ïathuh ba ha ka 25 tarik Rymphang, 2025, ka KSU kala phah ia ki jingthoh shaphang ki jingleh bym hok ha ka jingthungkam thungjam sha kiba bun ki dkhot jong ka Governing Council ka NLUM kiba ki dkhot ki kynthup ia ki Judge ka Meghalaya High Court, ki Ophisar na ka Sorkar Jylla, u Vice Chancellor bad kiwei kiwei ki kynhun ha kaba ha ka jingialang jong ka General Council ba long ha ka 26 tari Rymphang, 2025, kala iakren ia kane ka kam bad la shim rai bad ai jingbthah ruh ia u Vice Chancellor hynrei u VC u khlem leh eiei ban pynbeit ia ki jingleh bakla ia kaba la ioh jingtip da ka seng hadien ba ioh ia ka jubab na ka RTI. “U Prof Indrajit Dube ula pyniaid donbor ia ka NLU, thungkam ia ki nongtrei kat kiba iajan bad u bad kyntait ia ki trai riewlum kiba lah ban trei ia ka kam bad um don jingkwah ruh ba ka NLUM kan kiew hynrei u pyrkhat tang ia ki jingmyntoi shimet” ula ong. Ka KSU kala kynnoh ruh ba u Prof Indrajit Dube u ju leit man ka por sha Delhi, Kolkata bad kiwei ki bynta jong ka Ri da ka pynlut na ka pla tyngka jong ka University bad bynrap ba wat ka jingleit jong u kum u VC ne na ka bynta ki kam ka University ruh kim shym la don satia ia ki kot ki sla ban pynshisha kum ki shithi shah khot sngewbha lane kino kino ki kot ki sla.

U GS ka KSU u la ïathuh ba ka kaiphod jong ka RTI ka kdew ba naduh ba sdang treikam ka NLUM ha u 2023, u Prof Indrajit Dube u la pynlut haduh T.15.10 lak ha ka kam leit jingleit jong u ba kynthup ia ka jingthied tiket liengsuin, jaka sah, ka bam bad kiwei kiwei, ia kaba bun la ikop kum ka jingleit shimet, kumta ka dei ka jingpynsyrwa kai ia ka pisa ka Sorkar ne paidbah na ka bynta ka jingmyntoi shimet. “Kat kum ka RTI, ka NLUM kala pynlong ia ka jingialang “Climate Investment Coalition for the Global South’ ha ka 20 tarik Rymphang, 2025 ha Delhi bad ka mang tyngka baroh bala mang ia kane ka prokram la buh T.25 lak bad la lap ruh ba ka pisa ba T.3,56,750 la pynlut ha ka kyiad da u Prof Indrajit ha kane ka prokram” u la ong. Nalor kane u general secretary ka KSU u la kynnoh ruh ia ka jingthungkam beain bad siew tulop beain da u Vice Chancellor sha u Prof. of Practice, Prof. of in Residence, Associate Professor in Residence, Research Fellow, Post-Doctoral Fellow bad kiwei kiwei.

U Samla Donald u La kynnoh ba u Prof Indrajit ula thungkam haduh 6 ngut ki kynthup ba kynthup ia 3 ngut ki Prof. of Practice, 1 (uwei) Associate Prof. in Residence bad 2 ngut ki Prof. in Residence halor ki jingshemphang jong ki ha ki lain bapher bapher ki ban iarap ia ki samla pule. Kat kum ka RTI, kine ki briew ki hap ban ai jinghikai haduh 20 kynta ha ka shibnai la ka dei markhmat ne na shajngai hynrei ka Seng kala shem ba naduh ba u rungkam, napdeng ki 6 ngut, tang 2 ngut ki professor ula shim klas kata ruh kaba long haduh ka por bala buh bad 4 ngut kim pat ju shim klas satia.“Hynrei kila professor kila sei ia ka tulop bad kiwei kiwei ki jingmyntoi khlem da synniang eiei sha ki samla pule. Ki 3 ngut ki Prof. of Practice bala thung da u Prof. Indrajit Dube naduh u Nailur, 2023 kila wanrah ia ka jingpynlut ba kot haduh T.46,83,500 kum ka tulop/honorarium ka kot T.1,50,000/- shibnai bad T.8,26,301 kum ka baileit baiwai bad kiwei ki jingpynlut kata ruh khlem da wan shimklas ne ai jinghikai ia ki samla pule” u la bynrap.