klur mang ka sorkar ban pynkhuid bad pynitynnad ia ka Non Polok

Ka Sorkar Jylla hynne ka sngi ka la pynbna ban pynitynnad shuh shuh ia ka Nan Polok lane ka Ward’s Lake kaba don hapdeng ka Nongbah Shillong daka ba pynkhuid nyngkong iaka um kaba don ha kane ka pung. Ïa kane la pynbna da u Myntri ka tnat Tourism u Bah Paul Lyngdoh bad u la ong ba ïa kane ka rai la shim naka bynta ban khring shuh shuh iaki nongwan shangkai pyrthei hapoh ka Jylla. Haba kren bad ki lad pathai khubor, u Bah Paul u la ïathuh ba lyngba ka tnat Urban Affairs ka Sorkar kala mang T.7.03 klur na ka bynta ban pynitynnad ia ka Nan Polok kynthup ka jingpynkhuid iaka um ba don haka pung. U Bah Paul ba ka tnat kala dep khot Tender ban pynkhuid ia ka um kaba don haka pung bad ki kam kin sdang haki 2-3 taiew ban wan.

“Iaka um kaba don haka pung yn pynkhuid daka teknologi ‘Nano Bubbles’ bad hadien bala pynkhuid iaka um ba don haka pung, ka um kan long kaba khuid bha” u la ong. Nalor kane u Bah Paul u la pyntip ruh ba tang shu kut ka aiom slap kin sa lah ruh ban sdang noh sa ia ka ‘Light and Sound Show’ ha Nanpolok ia kaba la mang kumba T.4 klur ban pyntrei. U Bah Paul u la iathuh ba ka jingkhot Tender na ka bynta kane ka kam ruh kan sa sdang noh shen bad ïa kane ka Project yn pyndep hapoh 6-8 bnai.

Nalor kane u Myntri ka tnat Tourism u la ïathuh ba ka tnat kala pynkhreh ruh ban phah shna ia ki jaka leit bar kiba paka na ka bynta ki paidbah kumjuh na ka bynta ki nongwan jngohkai pyrthei ha ki 10 -12 tylli ki jaka ba la jied.“Ka tnat kala mang mar T.25 lak ban shna iaki jaka leit shabar haki 10-12 tylli ki jaka kum ha Umiam Lake, Nan Polok, Sohra, Dawki bad kiwei kiwei de” u la ong.