klur ai jingiarap ka sorkar sha ki synjuk ialehkai ban pynkhreh National Games

U Myntri Rangbah ka jylla u Conrad K Sangma hynne ka sngi ula ai ia ka Grants-In-Aid ba kot T.39 klur tam sha ki 26 tylli ki Sports Association ka jylla kum shibynta ban pynkhreh na ka bynta ka National Games ba 39 ka ban long ha u snem 2027 hapoh ka jylla Meghalaya. Ia kane ka jingiarap pisa ba T,39,17,64,000 klur la ai sha ki kynhun ialehkai ka Meghalaya, kynthup ka Meghalaya State Olympic Association (MSOA) bad ia ki 26 tylli ki Sports Association ne Synjuk Ialehkai ba kin pynkhreh ia ka National Games ha u 2027. Haba kren ha ka jingialang ha State Convention Centre, Shillong u Myntri Ragbah ula ong, “Ka jingthmu ka long ban sdang ia ki kam ban pynkhreh ia ka National Games lyngba ka jingkyrshan pisa ia ki synjuk ialehkai ka jylla. Kane ka long kyrpang namar ba dei sien nyngkong hapoh ka Jylla bad ia ka song pisa la ai beit sha ki synjuk ialehkai. Kane ka ai lad laitluid ba kin shim ka rai ba biang tam kumno ban pyndonkam ia katei ka pisa katkum ka jingdonkam jong ki. La ka dei ban wai ia ki Coach, ban thied ia ki tiar, ban pynlong Training Camp ne Talent Search Program, ka Association ka long laitluid ban pynwandur ia ka jingthmu bad ban leh ia ki kam katkum ka jingsngew ka jong ka”.

Ula ong ba kane ka prokram kam dei eh tang ban ai jingiarap da ka pisa hynrei kadei ruh shaphang ka jingshaniah bad ka sorkar kala pynkhamti ia ka jingkitkhlieh ha ki synjuk ialehkai, da kaba ngeit skhem ba ki tip kham bha ia kaei kaba kidei ban leh.Nalor kane u Myntri Rangbah ula kyntu ia ki synjuk ialehkai ba ki dei ban don ia ka thong ban khur haduh 50 tylli ki takma ha ka National Games ka ban long ha Meghalaya. Na ka liang u Myntri ka tnad Ialehkai u Bah Shakliar Warjri ula ong, kane ka ka dei ka sngi ban sah jingkynmaw ha ka histori namar ka dei kaei kaei kaba ym pat ju don mynno mynno ban ai jingkyrshan ia ki synjuk ialehkai na bynta ki jingdonkam.

U Myntri Rangbah ula ai jingiarap ruh T.1 Lak na ka tnad ialehkai ia ka samla Rifiness Warjri ba dei ka kynthei ba dang khynnah tam ha ka rta 20 snem, ka la pyndep pyndep ha ka jingkiew ia u lum Everest. Nalor kane u Conrad Sangma ula pynbna ban ai sa T.5 lak ia ka Refiness lyngba ka Chief Minister’s Special Grant.