Phah dorkhas ka HBDRF sha u MR Kynnoh pynkhein ki Karbi ia ka kular ban thung dieng ha Lapangap

Ka Hynñiewtrep Border Disputes Redressal Forum (HBDRF) hynne ka sngi ka la phah Dorkhas sha u Myntri Rangbah ka Jylla u Conrad K Sangma ban tuklar halor ka jingkajia pud hapdeng ka Assam bad Meghalaya ha ka shnong Lapangap, West Jaintia Hills District. Ia kane ka Dorkhas la aiti da u Nongaitktien ka HBDRF u Bah Thomas Passah. Ha ka Dorkhas ka HBDRF ka kynnoh ba ka Karbi Anglong Autonomous Council (KAAC) ha ka 10 tarik Jylliew ka la thungdieng ha ka shnong Lapangap, Block-I, khlem ka jingiasyllok bad ki Khlieh Synshar Shnong. Halor kane ka HBDRF ka la buh da ka jingujor ha ka Ophis u Deputy Commissioner ka West Jaintia Hills District.

“Ia ka jingialang la pynlong ha ka 19 tarik Jylliew, 2025 hapdeng u DC/SP ka West Karbi Anglong bad West Jaintia Hills District ha IB Khanduli, ha kaba la rai ban pynneh ia ka shongsuk shongsain bad ban pynsangeh ia ka prokram thung dieng. Hynrei, na Assam ki la pynkhein ia kane ka jingiateh kular bad pynbteng ia ka jingthung dieng khlem da iasyllok ia ki Nongialam Shnong” la kynnoh ka HBDRF. Ka HBDRF ka la kynnoh ruh ba ki paid Karbi ki la pynjulor bad thang ia ki lyngkha kba jong ki paid Pnar bad ha ka 26 tarik Jylliew, 2025, ki Pulit ka Assam ki la wan trui, bad kerkut ia ka jaka bad pyrshang ruh ban shna ia ka ktem.

Ka HBDRF ka kyntu ia ka Sorkar Jylla ban buh bun ki Pulit/SF ha ka thain na ka bynta ka jingshngain bad ban khang ia ki Pulit ka Assam ba kin shna ktem ha ka thain. Ka la kyntu ruh ia baroh arngut ki Myntri Rangbah ka Assam bad Meghalaya ba kin leit iuh kjat ha ka thain ban pynthikna ia ka jingshngain bad ban wanrah ia ka jingsuk. Ka Forum ka pynpaw ia ka jingsngew sheptieng ba lada ai lad ia ki Pulit Assam ban shna ktem, kan buh ha ka jingma ia ka jingim jong ki paidbah Pnar bad kan sa buh jingeh ruh ban weng pat ia ki lashai lashisngi.