Leit tur ka JSU ha DC ophis, dawa ban phah pulit SF-10 ha Lapangap

Ka Jaintia Students’ Union (JSU) hynne ka sngi ka la leit tur sha ophis u Deputy Commissioner, West Jaintia Hills District bad pynlong ia ka jingiakhih ba jai jai na bynta ban dawa ba ki bor sorkar ki dei ban phah mardor ia ki pulit SF-10 ha ka shnong Lapangap ban ai jingiada ia ki paidbah ba sah ha thain khappud bad ka jylla Assam. Ki nongialam ka JSU ryngkat bad katto katne ki longkmie ki la leit ialum hakhmat ka ophis treikam u DC ha kaba ki la rah ia ki jingthoh ban dawa ba dei ban ai ka jingshngain ia ki nongshong shnong ha khappud bad ka jylla Assam. Ha kane ka sngi, ki nongialam ka JSU ki la ai ia ka dorkhas ha u Deputy Commissioner ban phah noh mardor ia ki pulit SF-10 ha shnong Lapangap.

U General Secretary ka JSU u Neilkee Mukhim, ula ong ba ka JSU dang shen ka la dep iakynduh ia u Symbud Myntri Rangbah ka jylla uba khmih ia ka kam Pohiing u Bah Prestone Tynsong bad ia ka Director General of Police (DGP) bad ki la kyntu ban buh bun ngut ki pulit na ka bynta ka jingshngain bad ban ai jingiada ia ki nongshong shnong.Ula iathuh na ka liang u Deputy Commissioner ula pynthikna ba un phah da ka jingthoh sha ka sorkar ba kan buh ia ki pulit SF-10 ha katei ka shnong ban ai jingiada ia ki nongshong shnong, khamtam eh ha ka por ba ki leit ban bet symbai bad ban pynneh ia ka shongsuk shongsain ha ka thain.

U nongialam ka JSU ula iathuh ruh ba na ka liang jong u DC ula kyntu ruh ia ka JSU ban iadon bynta lang ha ka Peace Committee ban pynbeit ia katei ka mat bad ban pynthikna ba kan don ka jingsuk bad ka jingshngain ha katei ka thain.