Ban pynneh ia ki dohum, khang ban jar, khwai bad riam dohkha ha thwei Phanniewlahrum

Khnang ban pynneh pynsah ia ki dohdum dohwah ha ka thwei ha shnong Phanniewlahrum, ka shnong ka la shim ia ka sienjam ban ym shah ia ki briew ban khwai, ban bret jar, ban pyndonkam da kiwei ki buit ban riam ban pyniap ia ki dohkha. Kane ka jingiada ka long tang ha ka thwei naduh jingkieng haduh kham harum ka jingkieng khnang ban pynneh ia ki dohum dohwah katba kham sharum pat, ka shnong ka shah ban khwai katba mon tangba ym dei ban bret jar, pyndonkam bomb ne ber bih. U rangbah shnong ka Phanniewlahrum bah Selasson Ryntathiang u la iathuh ba mynshwa ha ka por ba u dang iakhynnah ha katei ka thwei, ki briew kim donkam ban da khwai, shu lynthem da u maw, la ioh dohkha lai ne saw tylli namar ba ki dohkha kila kharoi bad bun bha hynrei mynta da khwai ruh jynjar ban ngat namar ba kila shah pyniap dusmon.

Dei na kane ka daw, ba ka shnong ka kwah ban pynneh pynsah bad ban iada ia ki dohkha ha katei ka thwei bad, ka la shim ia ka sienjam ban ym shah shuh ban khwai, ne ban tong jar, ne leh kino kino ki buit ban riam ia ki dohum. U Rangbah Shnong ula ong ba ka shnong Phanniewlahrum bad Phanniewlahneng kila ia rai lang ban pynlong ia katei ka pung tang ban pynroi ban pynkha ia ki dohkha. Ka la pynkhreh ban den ia ka wah da ka skhim 100 sngi hynrei kan long kaba eh namar ba ka jingdonkam ka long kaba kham jur. U la ong ba ka donkam ban shna check dam tang katto katne phut ban bat ia ka um khnang ka pung kan neh ha ka por tlang ban juh ki dohkha ban shong namar ba ha ka por barit ka um, ki hiar lut shapoh bad ki wan kiew tang por lyiur.

Ka shnong kan leit tied jingkhang na ka tnad Fishery ba kan ai jingiarap ban tei kum ka check dam khnang ba ki pung kin ym rngad ha ka por, khnang ban pyllong ia ki dohkha ban shong beit ha katei ka pung kaban long shi bynta kum ka jaka ri ia ki dohkha bad ha kajuh ka por, kan khring ia ki briew ban wan peitkai khamtam ba katei ka thain ka don shibun ki jingitynnad ban khring ia ki nongwankai.