Iakren u MP bad ki ophisar ia ki skhim pynroi bad ki jingeh ki paidbah ka WKH

U Dr. R.J. Syngkon uba dei u MP ne dkhot jong ka Ïingdorbar Thaw Aiñ (Lok Sabha) na Shillong u la wan sha Nongstoiñ ban pynïaid ïa ka jingïalang jong ka District Development Coordination and Monitoring Committee (DISHA), kaba thmu ban bishar bniah ïa ka jingpyntreikam ïa ki skhim bad ki prokram bapher bapher ba la kyrshan da ka Sorkar Pdeng hapoh ka West Khasi Hills District.

Ia kane ka jingialang la pynlong ha Conference Hall jong ka ophis jong ka Deputy Commissioner, Nongstoin, ha kaba u bah Garod L. N. S. Dykes, IAS, Deputy Commissioner, uba la pdiang burom ia u MP bad kiwei ki riew rangbah. Ha kane ka jingïalang la ïohi ïa ka jingïashim bynta kaba radbah na ki nongmihkhmat bad ki heh ophisar jong ka district.

Napdeng kiba la donlang ki kynthup ia u Bah G. Momin, MLA ka Rambrai–Jyrngam Konstitwensi, U Bah Gabriel Wahlang, MLA ka Nongstoin Konstitwensi, U Dr. J. Ïawphniaw u MDC jong ka Nongstoiñ, U Bah H. K. Thabah, u Additional Deputy Commissioner uba la pyniaid ia kane ka jingïalang, U Bah V. Swer, ADC, ki EAC bad kiwei pat ki ophisar na ki tnad bapher bapher.

Ha kane ka jingïalang, la ai ïa ki jingkren kiba bniah halor ka jinglong jingman bad ka jingïaid shaphrang jong ki flagship scheme ba kongsan, kynthup ïa ka PMGSY, MGNREGA, Jal Jeevan Mission, PMAY-G, POSHAN Abhiyaan, NRLM, bad kiwei kiwei ki prokram ai jingmyntoi. U Dr. Syngkon ula ïakren bad ki heh sorkar ban sngewthuh ïa ki jingeh kiba dang ïaid shakhmat, ki jingjop, bad ki bynta kiba kongsan kiba donkam ban ïarap.

Ka jingialang ka la pynkut ha ka jingmut kaba bha ryngkat bad ka jingkut jingmut lang ban pynbha ia ka jingiatreilang hapdeng ki tnad bapher bapher, ban pynkhlain ia ki rukom peitngor, bad ban bteng ban buh hakhmat eh ia ka roi ka par kaba kynthup lang ia ki paidbah ka West Khasi Hills.