Plie ka HYC ia u Mot Tirot Sing Syiem ha Laitarted

Ha ka lyngkhuh sngi burom ia ka jingdap 190 snem jong ka jingkhlad u Syiem Tirot Sing Syiem la rakhe da kaba teinam da u mot ba shirynñieng ha Laitarted, Nongthliew, Eastern West Khasi Hills da ka seng Hynniewtrep Youths’ Council, kaba long ruh ka lyngkhuh snem ba khatwei jong ka seng. La plie paidbah ia u mot teinam da u Dr K M Syiemlieh, Syiem Khynnah ka Hima Nongkhlaw ryngkat bad u Bah Roy Kupar Synrem, President ka Hynñiewtrep Youths’ Council, ha kaba la iadonlang ki nongialam ka seng kiba kynthup ia u Bah Rhembor G Saibon, Donboklang Kharlyngdoh bad u Isaac Basaiawmoit bad kiwei kiwei.

U Dr K M Syiemlieh haba ai jingkren ula iaroh ia ka HYC kaba la tei ia u mot jong u Syiem Tirot Sing Syiem bad ula kyntu ia ki samla ba kin bud ia ka mynsiem ieit ri jong u Syiem Tirot Sing Syiem ha manla ki kam ba dei ban trei ha ka imlang sahlang ban kyntiew ia la ki paradoh parasnam.U President ka HYC ula pynpaw ka jingsngewnguh ia ki nongialam kiba hashwa, kiba kynthup ia u Bah Peter Lawai bad Bah Robert June Kharjahrin kiba la prat lynti ia ka seng haduh ba ula ioh lad ban trei borbah na ka bynta ban teinam da u mot ba 24 pruh jong u syiem bakhraw, Tirot Sing Syiem.

Ha kane ka nsgi, la pynkup burom ia u Dr K M Syiemlieh bad ia u barikor  u bah Raphael Warjri bad kiwei kiwei ki barikor jong ka Riti Academy kiba kynthup ia u Banteilang Hynñiewta, Returnwell Sutong bad ki kamar  Ialissing Mawrie, Banjop Leo Kharmalki, Ban Mawrie.Nalor kane, la pyllait ruh ia ka kotdur lyngkdop halor ka jingiakhun laitluid jong u Syiem Tirot Sing bad ka kot halor ka Synshar Paidbah Khasi ba la thoh da u Bah Raphael Warjri ha ka ktien phareng kaba la ai kyrteng Khasi Folk Democracy bad la ioh ruh ki jingrwai na ki kaitor bad duhalia kiba kynthup ia ka Snow White, Khmih Creative Society, Thunder Cave bad ka kynhun u Akbar Nongdhar.