Pynkhreh ka HANM ban leit tur sha Iing Dorbar Thawain ka Ri ban pynurlong ki jingdawa ka jaidbynriew

Ka Hynniewtrep Achik National Movement (HANM) ka la long ba la pynkhreh ban leit tur sha Iing Dorbar Thawain ka ri na bynta ban dawa ban pynurlong ia ki lai tylli mat jingdawa jong ka jylla kynthup ka Inner Line Permit, Ka ktien Khasi bad ka ishu Khappud. Ka HANM ka la kren ia kane ha ka iingrakhe ia ka lyngkhuh sngi iap ba 190 jong u riewkhraw ka ri bad ka jaidbynriew u Paiem Tirot Sing.Ka HANM kum ka dak ban kynmaw burom ia une u Khlawait ka ri, ka la pyllong ia ka jingleit buh syntiew hakhmat u mot dur ba shi rynieng jong u ba ieng ha phyllaw jong Soso Tham Auditorium, Shillong. Haba kren ha kane ka sngi, u President ka HANM u bah Lamphrang Kharbani, ula pynkynmaw ia ki kam ba radbah jong u Syiem Tirot Sing uba la ieng ban iakhun na bynta ban iada ia ka ri bad ka jaidbynriew. Kum u nongialam ka seng, ula ai mynsiem ia kiwei bad ula maham tyngeh ia ka sorkar jylla bad ka sorkar India ba kim dei ban ialehkai ia ki mat ki jura ka jaidbynriew kynthup ia ka Inner Line Permit (ILP), ka ktien khasi Garo bad ka mat pynbeit khappud.

“Ngi maham ia ka sorkar jylla bad ka sorkar India ba kim dei ban ialehkai ia ki ishu ka jaidbynriew haba iadei bad ka ILP, ka jingpynrung ia ka ktien Khasi bad Garo ha ka khyrnit ba phra jong ka riti synshar ka ri bad haba iadei bad ka ishu khappud,” ong u bah Lamphrang.Ula ong ba HANM ka long kaba la pynkhreh ia ka wat ba lai ba kan leit tur sha Iing Dorbar ka ri ban pynkyndit thiah ia ka sorkar india ba kadei ban pyntreikam noh ia kitei ki lai tylli ki mat ba kongsan jong ka jylla.“ Ko sorkar India hapoh ka jingialam jong u Modi ji bad ko sorkar Meghalaya hapoh ka jingialam jong u Conrad, ba kidei ban sngewthuh ia ka jingdawa jong ka jaidbynriew bad kidei ban sngewthuh ia ka dor jong ka pateng kaban sa kha,” ula ong.

U nongialam ka HANM ula ong ba ka seng ka la maham lypa ia ka sorkar India ba kin tur beit khlem kynran dien na bynta ban pynurlong ia ki mat jingdawa ka jylla. Katba na ka liang kiwei ki nongialam ka HANM ki la pynpaw ia ka jingsngewkhia ia ka jingshim sting ka sorkar India ia ki jingdawa jong ka jaidbynriew. Ki la kyntu ia ki samla ba kin bud ia ki dienjat jong u paiem Tirot Sing bad kidei ban long kiba shlur ban tur haduh ban da poi sha ka thong.