Thaw ka KHADC da ka Inquiry Committee, kaiphod hapoh 3 bnai

Ka Executive Committee (EC) jong ka Khasi Hills Autonomous District Council hynne ka sngi kala thung daka kynhun tohkit lane ka Inquiry Committee haba iadei bad ka jingkynnoh shah klun jaka haka Law Adong kaba don ha Mawpat. Kane ka wan shi sngi hadien ba ka EC haka jingialam u Chief Executive Member (CEM) u Bah Shemborlang Rynjah kila hiar hi sha Law Adong Mawpat pat jurip iaki bynta jong ka khlaw ba kynnoh shah klun jaka. Haba kren shaki lad pathai khubor u Executive Member (EM) ba khmih iaka tnat Land u Bah Powel Sohkhlet u la iathuh ba ia ka rai ban thung daka Inquiry Committee la shim haka jingialang jong ka Executive Committee ka KHADC.

U Bah Powel u la pyntip ba kin don 3 ngut ki dkhot jong ka Inquiry Committee bad ia kane ka Committee yn khlieh da Joint Secretary ka tnat Elaka u Bah John Dkhar ha ryngkat 2 ngut ki dkhot (Member) ba kynthup u Deputy Secretary jong ka tnat Land u Bah H Syiem bad u Under Secretary ka tnat Political u Bah S Lamare. “Kane ka Committee ba 3 ngut kan tohkit bniah halor ki jinglap hapoh katei ka khlaw bad kan peit bad bishar lut ia baroh ki jait jingkynnoh khamtam haba iadei bad ka jingioh jaka ki MLA, ka jingai jaka shaki kynhun balang bapher bapher bad baroh kiei kiei kiba don hapoh katei ka khlaw” la ong u Bah Powel.

U EM ula ong ba ka Committee kan khmih ruh ia ka jingiatehkular kaba la iasoi hapdeng ka EC kaba ialam da u Bah Ardent Basaiawmoit bad u Syiem barim ka Hima Mylliem u Paiem Latho Manik Syiem bad ka jingktah ia ka khlaw.“Ka EC kala bthah ia ka Committee ba kan aiti ia ka kaiphod jingtohkit hapoh ka 3 bnai. Shisien ba la ioh pdiang ia ka kaiphod, ka Executive Committee kana sa shong ban iatai bad ban shim ia ka rai ha kaba iadei bad katei ka khlaw” ula ong.