Pyntian smai u Sadon Blah ia ki nongkitkam ka HYNF Northern Region, u Robinson kum u President bathymmai

Ka Hynniewtrep National Youth Front (HNYF) Northern Region, ka la jied bad pynskhem ïa u Bah Robinson Umbah kum u President ba thymmai jong ka Northern Region, ha ka jingïalang kaba la long ha ka Sngi saitjain ha Auditorium Hall, Umsning.

Ïa u Bah Robinson Umbah la pyntian smai kum u nongïalam ba thymmai da u President Rangbah ka HNYF, u Bah Sadon K. Blah. Kane ka jingpynskhem ka wan hadien ka jingpynthymmai noh ïa ki nongkitkam ki ban ïalam ïa ka seng ha ka thaiñ Ribhoi bad ki ban trei na ka bynta ka bha ka miat jong ka imlang ka sahlang.

Ha kane ka jingïalang la pynskhem ruh ïa kiwei pat ki nongkitkam jong ka seng, kiba kynthup ïa u Prosperwell Shadap kum u Vice President, u Shiningstar Kyntla kum u Finance Secretary, u Donroi Kshiar kum u Education Secretary, u Vincent Sylliang kum u Organising Secretary bad u Banpynshai Umbah kum u Publicity Secretary. U Bah Hesting Lyngdoh pat u la shah pynskhem kum u Adviser, nalor kiwei ki nongkitkam.

Ïa ka jingïalang pynskhem la sakhi lang da u MLA ka Nongpoh, u Bah Mayralborn Syiem, uba long u Kongsan, ryngkat u Bah Sadon K. Blah, President ka HNYF Sengkmie, Bah Tyllibor Swer, Secretary ka Sengkmie, Bah Rocky Kylla, Chairman ka Umsning Town Dorbar, Bah Rangkynsai Makdoh, ki rangbah shnong bad kiwei ki ba shah khot sngewbha.

Haba ai jingkren hadien ka jingpynskhem, u President thymmai u Bah Robinson Umbah u la ong ba ka jingthmu jong ka seng bhalang kam dei tang ban tuklar ha ki kam shnong kam thaw, hynrei ka dei ban long ka kynhun kaba trei na ka bynta ka jingmyntoi u paidbah.

U la ong ruh ba don ki seng kiba mih tang na ka bynta ki jingmyntoi shimet, hynrei ka seng bhalang ka dei ban ïeng ha ka nongrim jong ka bad ban don ka jingïatylli bad ka jingïatreilang.

U Bah Robinson u la kyntu ïa ki dkhot ka seng ba kin ai ka jingïatreilang bad ka jingshaniah ïa ka jingïalam jong u, khnang ban lah ban pynkhlaiñ ïa ki kam jong ka seng bad ban ai ka jingshakri kaba kham bha sha ka imlang ka sahlang jong ka thaiñ.

U Bah Mayralborn Syiem, uba long u kongsan ha ka jingïalang, u la ai khublei kyrpang ïa ka Hynniewtrep National Youth Federation (HNYF) halor ka jingkynmaw bad ka jingkhot ïa u ban ïadonlang ha kane ka sngi kaba kyrpang, ha kaba la pynskhem ïa ki nongkitkam kiba thymmai jong ka seng.

Ha ka jingkren jong u, u Bah Mayralborn Syiem u la pynkynmaw ïa ka jinglong riewspah bad ka jingdonkam ban burom ïa ka kolshor, ka riti-dustur bad ka jinglong kyrpang jong ka Dong bad ka Thaiñ Ri-Bhoi, kumjuh ruh ka Ri Khasi baroh kawei.

U la ong ruh ba ka jingkiew shaphrang jong ka seng bad ka shnong ka thaw ka shong ha ka jingïatreilang bad ka jingïashaniah hapdeng ki nongïalam bad ki nongkitkam. Kumta, u la kyntu ïa ki nongïalam bad ki nongkitkam kiba thymmai ba kim dei ban don ïa ka mynsiem ïa bisni haba trei ïa ki kam jong ka sengbhalang.

U la kyntu ba ki dei ban don ka mynsiem jong ka jingïatreilang, ka jingïasngewthuh jingmut bad ka jingïashaniah iwei ïa iwei, khnang ba ki kam jong ka seng kin ïaid shaphrang bad ban lah ruh ban shakri hok ïa ka jaidbynriew bad ka imlang sahlang.

U Bah Mayralborn Syiem u la pynpaw ruh ba ka jingkitkhlieh jong ki nongkitkam kiba thymmai ka long kaba khraw, namar ki dei ban long ki nongïalam kiba lah ban pyni nuksa ha ka jingïatreilang, ka jingïaineh bad ka jingkitkhlieh ban shakri ïa ka jaidbynriew.