Pynpra ki longkmie ki jingker bad tala ba khang lynti ki briew na Assam ha Maikhuli

Ka jingïakynad hapdeng ki nongshong shnong na Maikhuli, Ri-Bhoi District bad ki briew na Assam ka la mih biang hadien ba la kynnoh ba ki briew na Assam ki la leit ban ker bad khang ïa ki lynti ïaid kiba pynïasoh bad ka Madan.

Katkum ki khubor, ka jingjia ka la jia ha ka por kumba 10:30 baje mynstep, ha kaba la kynnoh ba ki briew na Assam ki la ker da ki siej bad khang tala ban khang ïa kawei lynti ban rung sha Madan Shnong bad ïa kawei pat ka lynti ïaid paidbah. La kynnoh ruh ba ka la don ka jingpynpra ïa ka kynroh jong ka skul, da kaba pyndonkam ïa ka Puh Shilum.

Haba ki longkmie na Maikhuli ki la ïohi ïa katei ka jingjia, ki la leit sha katei ka jaka ban ïakren bad ki briew kiba don hangta. Hynrei, ka jingïakren ka la nang jur bad kylla long ka jingïaheh nia, kaba pynmih pat ïa ka jingïakurup hapdeng ki arliang mamla.

Haba ka jingïakynad ka dang jur, ki nongshong shnong khamtam ki longkmie na Maikhuli, ki la lah ban weng noh ïa ki jingker ki siej bad ki tala kiba la khang ïa ki lynti shnong.

Hadien ka jingjia, ki bor district Ri-Bhoi bad ki pulit kynthup ïa u N. Hajong, ADC, Ri-Bhoi, u Akash Marak, Magistrate, Nongpoh, u M. Marngar, Addl. SP, u P. Baida, OC, Khanapara Police Station bad u S. Khymdei, OC, Pillangkata Outpost, ryngkat bad kiwei pat ki ophisar bad pulit ki la poi sha katei ka jaka ban wanrah ïa ka jingshongsuk shongsaiñ bad ban nym ailad ïa ka jingïakynad ba ka nang jur.

Ha kajuh ka por, ki nongïalam jong ka FKJGP Raid Marwet hapoh ka jingïalam jong u Bah Denis Nongrum, President, u Bah Alan D. Sohpdang, General Secretary, u Bah Debos Chyne na FKJGP-NKHD bad ki nongïalam jong ka ARMPF ki la leit sha katei ka jaka ban pynshngain ïa ki Nongshong Shnong ka Maikhuli.

Haba kren sha ki lad pathai khubor, ki nongïalam jong kine ki seng ki la pynpaw ïa ka jingiaroh ïa ka jingshlur jong ki longkmie na Maikhuli kiba la mih shakhmat ban ïada ïa u pud u sam jong Meghalaya.

Ki nongïalam ki la kyntu ruh ïa ka Sorkar Meghalaya ba kan shimkhia ïa kane ka jingeh bad ban pynkhlaiñ ïa ki lad jingïada ha u pud u sam ha Maikhuli. Ki la dawa ruh ba dei ban pynbun ïa ka jingdon ki pulit ha katei ka thaiñ, khnang ban pynneh ïa ka jingshongsuk bad ban khanglad ïa ki jingjia kiba kum kine ha ka lawei.