Ka jingleit iasoh BJP 8 ngut ki MLA UDP ka lah ban wanrah jingkylla ia ka sain hima ha Jylla

Phra ngut ki MLA jong ka United Democratic Party (UDP) mynta ka sngi ki la pyniasoh noh ia lade bad ka seng BJP ha nongbah Delhi kynthup u Myntri ka tnat Pule Puthi uba dei ruh u MLA ka Amlarem constituency u Bah Lahkmen Rymbui, u MLA ka Mawsynram u Bah Olan Sing Suin, MLA ka Ranikor u Bah Pius Marwein, MLA ka Shella u Bah Balajied Kupar Synrem, MLA ka Nongpoh bah Mayralborn Syiem, MLA ka Sohiong bah Synshar Kupar Lyngdoh Thabah, MLA Khliehriat u Bah Kyrmen Shylla bad u MLA Mawphlang Bah Mathew Beyondstar Kurbah.

Kum ban pynpaw ka United Democratic Party (UDP) ka dei ka seng riewlum ba khlain ha jylla Meghalaya kaba don 12 ngut ki MLA hynrei mynta ka la kylla ka seng rit paid, hadien ba phra ngut ki MLA ki la leit iasoh bad ka BJP kaba synshar ia ka Ri India hapoh ka jingialam u Narendra Modi kum u Myntri Rangbahduh.

Kane ka jingphet 8 ngut ki MLA ka pynlong ia ka UDP ba duh noh ia ka kyrdan ba-ar ka jingbun paid ha ka Iing Dorbar thawain ba 60 ngut ki dkhot, katba ka BJP ba don 2 ngut ki MLA u Bah AL Hek bad u Bah Sanbor Shullai ka la knieh noh ia kyrdan ba-ar ha ka jingbud paid da 10 ngut ki MLA hadien ka jingleit iasoh 8 ngut ki MLA jong ka UDP.

Kum ban pynpaw ki 4 ngut ki MLA ba dang don ha ka UDP ki kynthup ia u President u Bah Metbah Lyngdoh uba long ruh u Myntri Sorkar Jylla, u Working President Bah Paul Lyngdoh, u Bah Nujorki Sungoh bad u Bah Renikton Lyngdoh Tongkhar.

Ki tyllong khubor ki la iathuh ka BJP bad ka NPP ki dang iakren bad 3 ngut ki MLA ka UDP ba kin pyniasoh noh sha ka seng ka jong ki hynrei haduh mynta kim pat ai satia ka rai la kin leit iasoh ha ka BJP. Hynrei la ioh jingtip ba 2 ngut ki MLA ki la rai ban leit iasoh bad ka seng NPP bad kin sa pyndep ha ka por kaba biang.

Ka jingkylla ka sain hima kam ktah tang ha Iing dorbar thawain ka jylla, hynrei kan ktah ruh ha District Council, namar 2 ngut ki MLA ka UDP kiba long ruh ki MDC ha KHDAC u Bah Pius Marwein bad u Bah Synshar Kupar Lyngdoh Thabah ki la pyniasoh sha ka BJP, kumta ka BJP mynta kan don ki MDC ha KHADC.

Ha ka jingshisha ka UDP ka don 5 ngut ki MDC ha KHADC hynrei na jingleit iasoh ki MLA sha BJP kan duh noh ar ngut ki MDC, katba 3 ngut ki MDC dang sah ki kynthup ia u nongialam ka Liang Pyrshah u Bah Titosstar Well Chyne, u MDC na Mairang Constituency u Bah Equator Nongrang bad u MDC ka Shella Constituency u Barikupar Synrem, bad bun ki phai khmat sha u Bah Barikupar Synrem la un neh ha ka UDP ne un leit pyniasoh BJP hadien u hynmen u Bah Balajied Kupar Synrem ula pyniasoh bad ka BJP.

Kumjuh kan ktah ia ka kam Nongialam Liang Pyrshah ha KHADC bad ki seng sain pyrthei la kin pynneh ia u Bah TW Chyne na ka UDP ne kin ai sha ka seng NPP ba bun paid bad lada bujli Nongialam Liang Pyrshah, lehse ka MDC NPP na Nongshken Constituency ka Kong Grace Mary Kharpuri ka lah ban shah jied noh kum ka Nongialam ka Liang Pyrshah ha KHADC.

Ka jinglong jingman ka sain hima ha Jylla ka lah ban ktah ruh ia ka sorkar jylla ha ki sngi ban wan na ka jingleit iasoh ki MLA jong ka UDP sha ka BJP, kumjuh kan ktah ia ka UDP ha ka ilekhon MP shiteng samoi na Shillong Parliamentary Constituency.