Ar tylli ki jingkieng plie u Myntri Rangbah ha rilum Garo

U Myntri Rangbah ka jylla u Conrad K. Sangma hynne ka sngi ula plie paidbah ia ar tylli ki jingkieng ha wah Damring ha Chidaret, North Garo Hills.Haba kren ha kane ka sngi ka jingplie ia ka jingkieng, u Conrad ula ong ba kine ki ar tylli ki jingkieng kawei kaba pyniasoh na Chidaret sha Thapa Bazar bad kawei ha surok Bajengdoba–Resubelpar. Kine ki jingkieng la khmih lynti ba kan pynsuk ia ka leit ka wan jong ki hajar ngut ki nongshong shnong ha kane ka thain.“ Ki jingkieng bad ki surok kim dei tang ba pyniasoh hynrei ka plie lad ia ki paidbah ba pynsuk ia ki ha ka kam khaii, kan iarap ia ki paidbah ba shitom kiba donkam ban ioh ia ka jingsumar bad kumjuh ha ka pule puthi,” ula ong. U Conrad ula ong ba ka jingdon kine ki jingkieng kan iarap ban weng ruh ia ka jingeh jong ki paidbah kiba sah ha shilliang jong ka wah bad kan iarap ban pyllait jingeh ia ki khamtam ha ka por slap.

U Myntri Rangbah ula ong ba ka sorkar jylla ha kine ki hynniew snem ka la leh ia kaei kaei kaba ka sorkar barim kam shym la lah ban pynurlong ha ki snem mynshwa.“ Ha ki hynniew snem, ngi la pynkiew ia ka bhah mang tyngka sha ka T.5,000 klur na bynta ki surok. Ka jingpylleit jingmut jong ngi ka long na bynta ban thaw ban wanrah ia ki surok ba bha kiba lah ban pynaisoh ha kylleng ka jylla,” ula ong.Ha kajuh ka por, u Myntri Rangbah ha kane ka sngi ula iathuh ba ka Myntri ka sorkar pdeng ka Nirmala Sitharaman ha ka jingwan jngoh jong ka ia kane ka jylla, ka la iaroh ia ka jingkiew bad ka jingkylla kane ka jylla.

“ Ha ka jingwan jngoh kaba lai sngi jong ka Myntri ia ka jylla Meghalaya, ka Myntri ka la pyllut por ban iakren bad ki nongrep, ki kynthei bad ki samla na kylleng ka jylla,” la ong u Myntri Rangbah ka jylla bad ula bynrap, “ Ka la iohi ia ki kam ba la pyntrei da ka sorkar jylla na bynta ban kyrshan ia kiba bun ha ka imlang sahlang kynthup naduh ka kam rep kam riang haduh ka jingseng kam bad ka jingpynkupbor ia ki kjynthei. Ha ka jingthoh Article jong ka, ka la kren halor ka jingtyllun ki kam ba jar jar bad ka jingkylla ha kane ka jylla.”Ula ong ba ka Myntri ka la ai jingiaroh ia ki sienjam ba la shim da ka sorkar na bynta ban pynkhlain bad ban pyniasoh ia ki surok, bad ban pynkupbor ia ki Self-help groups (SHGs), ban kyntiew ia ka kam jngohkai bad ban kyntiew ia ka rep ka riang.