Synjor ka jingkieng ha Risiang, syier ki paidbah nongshong shnong

Ka jinglong synjor bad bym shngaiñ shuh jong ka jingkieng ha ka shnong Risiang kaba don hapoh ka surok PWD lyngba ka surok Nongstoiñ-Maweit ka la pynmih ka jingsyier kaba khraw ia ki paidbah, bad ka la pynlong ruh ïa ka shnong ban dawa kyrkieh na ka sorkar ban shimkhia mar mar halor katei ka kam.

U Rangbah Shnong ka Risiang, u Bah Stephan Marthong, haba kren na ka bynta ka shnong, u la pynpaw ka jingsngewkhia jur halor ka jinglong synjor bad jingjulor jong katei ka jingkieng. U la ong, “Ki nar rod ki la mih shabar bad la pyut, ki boltu ruh babun ki la kdiah bad la hap noh. La sakhi ba katei ka jingkieng ka la jan julor lut, bad lada ym don kano kano ka jingpynbha kaba kham kloi, ka lah ban wanrah ka jingjia ba sngewsih ha kano kano ka por.

Ha kajuh ka por, ka Dorbar Shnong ka la ai ka jingkyrpad kaba jur sha ki bor ba dei peit, khamtam eh sha ka tnat Public Works Department (PWD), ba kin shimkhia mar mar ban pynbha noh ïa katei ka jingkieng. Ki la kdew ba ka jingpynbha ne shna thymmai kloi ia katei ka jingkieng ka long kaba donkam eh ban pynshngaiñ ïa ki nongleit nongwan bad ki paidbah kiba pyndonkam ïa katei ka surok man ka sngi.

Ka Dorbar ka la dawa ruh ban mang pisa kloi na ka bynta kane ka kam, da kaba kdew ba ka jingpynbha ïa ka jingkieng ka long kaba donkam eh na ka bynta ka jingshngaiʼn ha ka leit ka wan jong ki paidbah ha kine ki sngi ban wan.