Plie u Conrad artylli ki Open Gym ha Tura

U Myntri Rangbah ka jylla u Conrad K Sangma hynne ka sngi Baar ula plie ia ki artylli ki Open Gym ha Tura bad buh ia u mawnongrim ban tei ia ka Skating Arena ha ka shnong Tetengkol bad ban tei ia ki kamra skul jong ka Bidanchi Higher Secondary School.U Conrad Sangma ula plie ia ka Open Gym kawei kaba don ha ha ka shnong Goanang bad kawei pat ha Nehru Park bad ula ong ba kine ki jingtei kin ai jingmyntoi shibun ia ki paidbah jong ka sor Tura bad ula pyntip ruh ba yn sa tei ruh sa 5 tylli ki ‘Open Gym’ hapoh Tura. Ula pynbna ruh ba yn sa tei ia ki ‘Open Gym’ ha kylleng ki bynta jong ka jylla Meghalaya, ban ailad ia ki paidbah ban ioh ia ka jingim kaba koit ba khiah bad kaba khlain.U Myntri Rangbah haba ai jingkren, ula pyntip ruh ba yn shna pynbha noh ia ka Tura Botanical Garden kaba don ha ka shnong Goanang da kaba tei ia ki Pathways, Canopy Walk bad ka Cafeteria ha ka jinglut jingsep ka kot T.3.8 Klur.

Ula iathuh ba yn shna pynbha ruh ia ka Nehru Park Tura da kaba buh ia ki jingtei ki bapher na ka bynta ban pynbyrngia bad ban pyndonbynta ia ki nongwankai.Ula buh ruh ia u mawnongrim ban tei ia ka Skating Arena ha ka shnong Tetengkol ha Tura. Kane ka Skating Area kadei kaba la tei da ka Global Himalayan Expedition.U Conrad ula buh ruh ia u mawnongrim na ka bynta ban tei shuh shuh ia ki kamra skul jong ka Bidanchi Higher Secondary School ia kaba la bei tyngka lyngba ka Chief Minister’s Special Development kaba T.10 lak.U Myntri Rangbah la aiti ruh ia ki shithi bhah tyngka sha ki 12 tylli ki kynhun bad ki jaka pule ha Tura kaba la kot ia ka T.80 Lak.Ula leit ruh ban jurip ia ka jingtei ia ka Indoor Stadium ha ka shnong Sunny Hills bad ula bthah ia ka tnad Sports ba kadei ban pynthikna ba dei ban tei pyndep hapoh u Nohprah mynta u snem bad ban pynlong ia ka jingiakob ialehkai Badminton.

Ia kane ka Indoor Stadium la tei, da kaba phaikhmat ban lah ban pynlong ia ka 39th National Games.U Myntri Rangbah ula pyntip ba ka sor Tura kan pynlong ruh ia ki katto katne ki jingiakob ialehkai ha ka National Games bad ka sorkar kan pynshlur bad kyrshan ia ki Homestay kiba don 10 tylli ki kamra ha Tura, ha ka jaka ban shna ia ka Games Village na ka bynta ki nongialehkai.