Ka Sorkar kam lah ban pyntreikam ia ki Project khlem jingbit: Paul

U Myntri ka tnat Tourism u Bah Paul Lyngdoh ula ong ka Sorkar kan nym pyntreikam ia kino ki project khlem da ioh jingbit na ki tnat bapher bapher. Ia kane u Bah Paul ula jubab halor ka jingsngewkhia haba ia dei bad ka jingpom dieng na Lum Shillong ban sdang ia ka Shillong Rope Project. Lah ban kdew ba ka projek Shillong Ropeway ka la mad ïa ka jingeh na ka daw jong ka mukotduma public interest litigation (PIL) kaba la ujor ha Meghalaya High Court pyrshah ïa ka jingpom dieng ha ka thaiñ Lawsohtun East Khasi Hills district.

Haba kren shaki lad pathai khubor u Bah Paul ula ong ba ka Sorkar ka la dep ban pynshai sha ka iing bishar ha kaba iadei bad ki jingioh jingbit ba donkam kynthup ia ka jingioh jingbit ban pom dieng hapoh ka thain Lawsohtun. “Ka Shillong Ropeway projek ka la kynduh mawjynthut namar kane ka PIL hynrei mynta ka sngi ngi la pynshai sha ka Meghalaya High Court ba ngi la dep ban ioh jingbit na ka tnat Ministry of Forest ban pom dieng kumta ka kam jong kane ka project kan sa sdang biang” la ong u Bah Paul.

U Bah Paul ula ong “Ha kaba ïadei bad ki dieng kiba la pom, kane ka la wan hadien ba ngi la ioh jingbit naka Minsitry of Forest bad kaba ngi la ïoh shwa ba ngin sdang iaka kam”. Haba kylli halor ka jingsdang ban thung dieng biang, u Myntri ula ong ba ka jingthung dieng biang kan sa sdang ynda la dep ïa ka projek. “Shisien ba ngi la dep ïa ka Shillong Ropeway projek phin sa ïohi ba ka jingthung dieng bad ka jingpynheh khlaw kan sa ïaid shakhmat. Kaei kaba ngi leh mynta ka long tang ban pynsuk ïa ka jingpynkhuid ha ban iaid beit ki kam jong ka Projek” ula ong.