Noh ka kali sha riat Rngain Khlad shen 5 ngut na kajuh iing kynthup i kyllung

Ha kawei ka jingjia ba sngewtriem san ngut ki briew na kajuh ka iing kynthup u khynnah ki la iap hashen, hadien ka kali Maruti Alto ML05 U 4926 ba ki shong ka la noh sha riat Rngain hynnin ka miet sngi u Blei na ka daw ka jingdum lyoh bad bym don ki jingker ne ki dak ban iada ha katei ka surok kaba dang shna mynta. La iathuh ki 5 ngut kiba la iap la ithuh kyrteng ka Kong Elida Marbaniang 65 snem ka lok jong u bah Elbiwell Kharbudon bad u Mebanador Marbañiang 28 snem bad u Aimiki Marbañiang 23 snem u nongniah kali ki dei ki khun jong u bah Elbiwell Kharbudon na shnong Langkyrdem Laitlyngkot bad ka kong Risbun Kurbah 22 snem ka lok jong u bah Mebanador Marbañiang bad u Dameban Shngaiñ Kurbah ba dang don shisnem shiteng khun jong u Mebanador na ka shnong Mawpunrum, East Khasi Hills.

Ki pulit ki la iathuh ba kane ka jingjia ka la jia hynnin ka miet 3 tarik Nailar por  9 baje mynmiet katba ki dang wan phai na Laitlyngkot ban leit sha Pynursla, hynrei ka kali ba ki shong ka noh sha riat ba jylliew ha rngain. La suba kane ka jingjia ka lah ban dei na ka jingdum u lyoh khyndew kaba pynlong ia katei ka kali leit noh sha riat bah ha surokbah NH 40, Shillong -Dawki.

Ki pulit hynne ka sngi ki la hiar ban leit wad ia kine ki briew ba hap shapoh riat bad pynlong ka jingtohkit halor katei ka jingjia ba hap hapoh ka Pynursla Civil Sub Division. La kynnoh katei ka jaka ba noh ka kali sha riat kam don kynroh satia ban iada ia ki kali ba leit ba wan ban lait na kino kino ki jingjia.