Leit jngoh Chairperson SCPCR ia ka khynnah ba shah dung injekshon ha Roberts Hospital

Ka Chairperson jong ka State Commission for Protection of Childs Right (SCPCR) ka Agatha Sangma hynne ka sngi, ka la pynrem jur ia ki runar kiba la dung da u injekshon ia ka khynnah skul bad ka kyrmen skhem ba ki pulit kin ioh kem noh ia kine kiba donkti. Ka Agatha Sangma ryngkat bad ki dkhot jong ka SCPCR ki la leit sha Dr H Gordon Roberts Hospital ban peit bad iakren bad ka khynnah kynthei kaba la shitom na ka jingshah dung da u injekshon ha ki runar bad hadien kane ka la leit ruh ban iakynduh ia ki doctor ba khmih ia ka ban tip shaphang ka jinglong jingman bad ia ka koit ka khiah jong kane ka khynnah kynthei. “Nga lah ioh ban iakren bad kane ka khynnah bad nga dap da ka jingkmen ba watla kane ka khynnah ka la shah dung da u injekshon hynrei ka dang don ia ka bor pyrkhat kaba biang ban leit phah khmih ia lade ha ka jaka sumar bad ban shah sumar hapoh hospital bad kane ka jingdon kane ka khynnah ia kane ka rukom pyrkhat ka long kaba kongsan bha namar hashwa ban jia eiei, kala ioh noh mardor ia ka jingsumar” la iaroh ka Agatha ia ka jingshemphang kane ka khynnah kaba la shah dung da u injekshon ha ki runar.

“Ka long ka jingjia kaba la pynkyndit namar ka dei kaei kaei ka bym pat ju jia hapoh ka jylla ka jong ngi mynshwa bad nga sngew khuslai ba kan jia kumne. Ngi lah ioh kren ia u doctor bad kane ka khynnah ka la don hapdeng ka jinglong jingman kaba biang bad kam don ha kano kano ka jingma. Kum kine ki jingjia, ka long kaba donkam ban long kiba husiar bha bad kum ka Commission ngi pynrem jur ia kane ka jingleh kaba kum kane bad ngi kwah ba ka jylla ka jong ngi kan dei kaba shngain ia ki khynnah ki jong ngi. Ka dang iaid lynti ban leit sha skul bad ban leit sha skul kadei ka hok ia man la ki khynnah bad ngi kyrmen skhem ba ngin lah ban ai ia kata ia man la ki khynnah” la ong ka Agatha bad ka bynrap, “Ngi donkam ia ka jingiatreilang na baroh, ka sorkar ka hap ban leh ia la ka jong ka bynta bad ka imlang sahlang ruh kadei ban leh ia la ka jong ka bynta bad ki nongpathai khubor ruh kila rah ne pynsngew ia kine bad nga dap da ka jingkmen ba kila lah ban pynsngewthuh ia ki paidbah bad ngi kum ka Commission ngi ialeh ban leh ia kiei kiei kiba long hapoh ka bor ka jong ngi”.

Halor ka jingsngew syier bad jingkhuslai ki kmie ki kpa ban phah hi noh ia la ki khun sha skul, ka Agatha ka la ong,“ Kane ka dei tang kawei ka jingjia kaba la jia hapoh ka jylla Meghalaya baroh hynrei salonsar hi, ki khynnah ki la leit sha la ki skul. Nga kyntu ia ki khynnah ba ki dei ban bteng ban leit sha ki skul bad kim dei ban sheptieng tang namar jong katei kawei ka jingjia. Nga kyrmen bad nga duwai ba kitei kiba leh ia ka kam sniew kin shah kem hynrei kumba long mynta hi, ngim don ia kino kino ki sabut na ki kor CCTV ban tip mano ba la leh ia katei ka kam sniew namar wat katei ka khynnah kynthei ruh kam lah ban kynmaw ia u nombar jong ka scooty ne ithuh ia kitei ki briew namar ba kila kah ia ka durkhmat ka jongki bad deng ia ka helmet.”.Ka Chairperson jong ka SCPCR ka la ong, ki pulit kila pynlong ia ka jingtohkit halor kane ka jingjia bad ka kyrmen skhem ba kin lah ban kem ia ki runar kiba donkti bad kala pynshlur ia ki khynnah ba ki dei ban bteng ban leit sha skul bad ka sorkar bad ka imlang sahlang kin hap ban long kiba husiar bad kiba peitngor bha bad kadei ruh ban don ka jingpahara kaba khlain khamtam eh ha ki jaka kiba ju mih ki jingjia.