Bynniaw ki nongdie jain ha Khasi Market ba slem pyndep ia ka Stand Taxi Jaiaw

Ka Synjuk ki Nongdie Jaiñ kiba shong die mynshwa ha Khasi Market kaba don ha khrum ka Jaiaw Taxi Stand hynne ka sngi ki la kynduh ia u Chief Executive Officer (CEO) ka Shillong Municipal Board (SMB).Kane ka jingiakynduh kadei ban pan jingpynshai halor ka jingpynslem ban pyndep ïa ka jingtei ha Stand Jaiaw.Lah ban kdew ba haka 11 tarik Nailar 2023, ka Shillong Municipal Board kala ia soi jingthoh bad ka Synjuk ki Nongdie Jaiñ ban kynriah shwa ha Pahsyntiew Stand lane Stand Bhoi kaba don ha Garikhana namar donkam ban pynpra bad shna thymmai iaka Jaiaw Taxi Stand.Haka jingiasoi, ka SMB kala kular ban pyndep iaka Jaiaw Taxi Stand tang hapoh 10 bnai lane 1 snem hynrei mynta la 2 snem tam ka SMB kam pat pyndep iaka Taxi Stand.

Haba kren sha ki lad pathai khubor ka Secretary jong ka Synjuk ka Kong Larisuk Rani ka la ong ba ka jingpynslem ban pyndep iaka Taxi Stand ka buh jingeh iaki longkmie Khasi ban im kamai naka jingdie jain namar ki briew kim ju kham wan shuh sha Pahsyntiew Stand lane Stand Bhoi kaba don ha Garikhana.Ka Kong Larisuk ka la ong ba ka Iew die jain ha Stand Bhoi ka hiar bha ka jngai palat bad ka kamai ka jih jong ki ruh ka la ktah shibun lada nujor haka por ba ki dang shong die jain ha Stand Jaiaw.”Haka jingiasoi soskular bad ka Synjuk, ka SMB ka kular ban pyndep iaka Jaiaw Taxi Stand hapoh 10 bnai hynrei mynta ngi lah ap la 2 snem tam bad haduh mynta ia kane ka jaka ieng kali ym pat lah ban shna pyndep” la ong ka Kong Larisuk.

Ka la iathuh ba naka liang ka Synjuk kala dawa na u CEO ban bthah ia u Contractor ba dei peit ia katei ka jingtei ban leh kham kloi ban pyndep noh khnang ba kin ioh ban leit shong biang ha Stand Jaiaw kaba lah ban pyndap pynbiang ia ka kamai kajih jong ki. Haba kylli naka liang ka President jong ka Synjuk ka Kong Sheba Nongbet ka la iathuh ba haka jingialang u CEO ka SMB u la kular ban pyndep noh iaka Stand Jaiaw ha u bnai Kyllalyngkot 2026.