T.220 klur ai ka DoNER ki project jngohkai ha Sohra, ka Heritage Resort ha Lawsohtun

Ka tnat Ministry of Development of North Eastern Region (DoNER) ka Sorkar Pdeng kala mang ban pynlut haduh T.220 klur ban tei daki project jongohkai pyrthei bapher bapher hapoh ka thaiñ Sohra. Ïa kane la pyntip da u Myntri ka tnat Tourism u Bah Paul Lyngdoh bad ula pyntip ruh ba kane kadei ka sien ba nyngkong baka tnat DoNER kan bei tyngka da lade naka bynta ki project jong ka tnat Tourism namar haki snem bala leit, iaka mang tyngka la mang hi beit daka tnat Ministry of Tourism Sorkar Pdeng lane ka ADB ne NDB. Haba kren shaki lad pathai khubor u Bah Paul ula ïathuh ba iaka song tyngka ba T.220 klur la mynjur hi da u Myntri ka tnat DoNER Sorkar Pdeng u Jyotiraditya M Scindia.

U Bah Paul ula ïathuh ba iaki maw nongrim ban tei iaki project bapher bapher jong ka tnat hapoh ka thaiñ Sohra yn wan plie hi da Myntri ka tnat DoNER ka Sorkar Pdeng u Jyotiraditya M Scindia haka por ba un wan shim bynta haka tamasa Cherry Blossom Festival 2025. Nalor kane u Myntri ka tnat Tourism ka Sorkar Jylla ula ïathuh ruh baka tnat kala rai ban tei daka Heritage Resort ha Lawsohtun kaba dei ruh ka Iing lane ka Complex jong ka tnat Textiles. U Bah Paul ula ïathuh ba iaka Complex jong ka Sericulture Farm kaba don ha Lawsohtun kaba don marjan ruh baka Shillong Ropeway Project kadei kaba la tei daka Sorkar Phareng naduh u snem 1925.

“Ka jingthmu ban pynjylla Heritage Complex iaka Complex jong ka tnat Textiles kadei kum shi bynta ban pynneh pynsah iaki jingdon jingem kiba rim ka ban khring iaki nongjngohkai pyrthei hapoh ka thain bad ka Jylla khamtam hadien bala plie iaka Shillong Ropeway” ula ong.