Pan jingshai ka HYC na ka sorkar halor ka rai siew tulop ia ki nongtrei District Council

Ka Hynniewtrep Youth Council (HYC) hynne ka sngi ka la dawa na ka Sorkar Jylla ban pynshai halor ka rai ban siew hi noh da lade ia ka tulop ki nongtrei District Council (KHADC). Kane ka jingdawa ka HYC ka wan hadien ba u Myntri Rangbah ka Jylla u Conrad K Sangma ha ka miet 25 tarik Nailar ula pynbna ba naduh 1 tarik Naiwieng 2025, ka Sorkar Jylla kan siew hi noh ia ka tulop jong ki nongtrei ka KHADC, JHADC bad GHADC. Haba kren shaki lad pathai khubor u President ka HYC u Bah Roy Kurpar Synrem ula ong ba ka seng kam pat kwah ban kam ba ka kyrshan ne pyrshah ia ka rai jong ka Sorkar Jylla, namar ka Sorkar Jylla ka donkam ban pynshai, la kane ka rai kan ktah ne em ia ka rukom treikam ki District Council hapoh ka Jylla. U Bah Roy ula ong, ba u Myntri Rangbah un hap ban pynshai, haei la thoh hapoh ka Khyrnit ba Hynriew (Sixth Schedule) ba ka Sorkar Jylla ka hap ban siew ia ka tulop ki nongtrei jong ki District Council kiba don ha ka Jylla.

“Hapoh ka Khyrnit ba Hynriew (Sixth Schedule) jong ka Ri India la kren shai ba ki District Council ki don laka jong ka bhah pisa (Fund) ban pyntyllun iala ki kam bad haka juh ka por ban siew tulop iala ki jong ki nongtrei” la ong u Bah Roy. U President ka HYC ula ong ba u Myntri Rangbah un hap ban pynshai, la ka Sorkar kan wanrah jingpynkylla hapoh ka Khyrnit ba Hynriew (Sixth Schedule) ban bsuh ia i kyndon ban siew hi ka tulop jong ki nongtrei.Ula ong ba katkum ka Khyrnit ba Hynriew (Sixth Schedule) ka Ri India, ki District Council ki don ka jinglaitluid lane (Autonomy) bad kane ka rai jong ka Sorkar ban siew hi ia ka tulop jong ki nongtrei kan wanrah u dak jingkylli ba heh, hato ki District Council ki dei kiba laitluid.

“Lyngba kane ka rai, u dak jingkylli u mih, hato mynta ki nongtrei jong ki District Council kin kohnguh iano. Kin kohnguh ia ki EM ne ia ka District ne kin kohnguh ia ka Sorkar kaba siew tulop ” la buh jingkylli u President ka HYC.U President ka HYC ula buh jingkylli ruh ia u Myntri Rangbah, hato kane ka rai ban siew tulop ka dei tang ia ki nongtrei ne wat ia ki Executive Member (EM) bad MDC. Ula buh jingkylli ruh ia ka Sorkar, hato ka Sorkar kan shim noh ia ka bhah ba ki District Council ki ioh, la ka dei na ki marpoh khyndew, transport, professional tax bad kiwei kiwei.