Dawa ka KSU ban mynjur da ka Resolution ban pyrshah tih Uranium ha Domiasiat

Ka Khasi Student Union (KSU) hynne ka sngi kala dawa naka Sorkar Jylla ban mynjur daka Resolution hapoh a iingdorbar thaw ain ban pyrshah tih Uranium napoh ka shnong Domiasait South West Khasi Hills bad naka Jylla Meghalaya baroh kawei.

Ka KSU kala dawa ruh na baroh 3 tylli ki District Council kata ka Khasi Hills Autonomous District Council (KHADC), Jaintia Hills Autonomous District Council (JHADC) bad Garo Hills Autonomous District Council (GHADC) ban mynjur lang daka Resolution ban pyrshah tih Uranium.

U President ka KSU u samla Raymond Kharjana ula iathuh ba ka seng kala ioh jingtip ba kila don ki briew bad kynthup ki MLA barim kiba la wan kai shaka thain Domiasait bad kiwei ki shnong ba marjan naka bynta ban pynbor iaki nong shong shnong ban die iaki jaka jong ki.

U samla Raymond ula ong baka shnong Domiasait ne ki shnong ba marjan kim dei ki jaka jngohkai pyrthei bad dei namar kane ka KSU ka sngewthuh shai baka jingthmu ban thied jaka ki katto katne ki briew kynthup ki MLA barim kadei beit ban die kylla shaki Company khnang ban ioh tip uranium.

“Ngi kwah ban phah ka kyrwoh kaba shai baka KSU kan nym shah da lei lei ruh ban tih Uranium naka shnong Domiasait ne ki shnong ba marjan” la ong u samla Raymond.

U President ka KSU ula iathuh ba haka 1 tarik ka seng kala kynduh ia u Myntri Rangbah ka Jylla bad haka jingialang kala ban jur iaka jingdonkam ban mynjur daka Resolution hapoh ka iingdorbar thaw ain ban pyrshah iaka jingtih Uranium hapoh ka Jylla.

Ula ban jur baka Sorkar kadei ban pyni daka kam ba ka shimkhia iaka jingpyrshah jong ka haba iadei bad ka jingtih Uranium hapoh Meghalaya.

“Ia kaba mynta ngi dang dawa naka Sorkar Jylla bad baroh 3 tylli ki District Council kidei ban mynjur daka Resolution ban pyrshah tih Uranium napoh ka shnong Domiasait bad ka Jylla baroh kawei. Iaki sienjam baka seng kan shim halor kane, ka CEC kan sa shong ban ia pyrkhat” ula ong.

Naka liang u General Secretary ka KSU u samla Ruben Naijar ula kam ba tnat Ministry of Forest and Environment kala mynjur iaka Office Memorandum (OM) ha u bnai Lber 2025 bad kane ka OM ka kdew shai ba ym donkam shuh ban pan jingbit naki trai shnong bad ym donkam shuh ban don Public Hearing haba tih Uranium bad Thorium.

U samla Ruben ula ong baka KSU ka ieng hat ryngkat bad ki nong shong shnong Domiasait kata ban pyrshah beit ia kano kano ka jingthmu ban tih Uranium, la kadei naka liang ka Sorkar Jylla ne Sorkar Pdeng.

U la ong ba naduh ki por mynshwa ka shnong Domiasait haka jingialam lynti i Meiieid Spility Lyngdoh Langrin (Bam Kwai Dwar u Blei) kala pyrshah iaka UCIL ban wan tih Uranium wat hapdeng ka jingshah tyrwa pisa daki phew klur.