“Saw ngut ki Judas na Congress ki die ia lade ban myntoi shimet”

U nongialam ka All India Congress Committee (AICC) u Mathew Anthony ula ong ba ki saw ngut ki MLA kiba la iehnoh ia ka seng Congress ki dei ki ‘Judas’, namar ba ki la shet kylla ia ki paidbah kiba la pynjop ia ki kum ki MLA na ka party Congress. Ki saw ngut ki MLA kiba la iehnoh ia ka party Congress ki kynthup u Dr Celestine Lyngdoh, bah Charles Marngar, bah Gabriel Wahlang bad u bah Ronnie V Lyngdoh. Haba kren sha ki lad pathai khubor, u Mathew Anthony ula ong ka jingkhot jongu ia kine ki saw ngut ki MLA da kane ka kyntien ‘Judas’, ka long namar ba ki la die ialade tang na bynta ka jingmyntoi shimet.

Ula ong ba kine ki saw ngut kiba la iehnoh ia ka party, ki la shah jied kum ki MLA namar ba ki iakhun na ka shap jong ka ‘Kti’ ym namar ba ki iakhun kum ki kyrtong shimet. “Ka jingjop jong ki, ka dei namar ba ki iakhun na ka shap jong ka ‘Kti’ bad kane ka pyni ba ki paidbah ki shaniah ia ka Congress party, hynrei kine tang na bynta ka jingmyntoi shimet ki la die noh ialade,” ong u Mathew. Ula ong ba ka Congress ka la ju mad ia ka jingshah shet kylla bad ka la mad bun ki jingeh, hynrei watla katta ki dang bun ki paidbah kiba shaniah bad kiba kwah ban iasoh bad ka party.

“ Ngi ka kwah ia ki briew kiba lah ban treihok ban ai ka jingshakri kaba hok sha ki paidbah bad sha ka party, ym ia ki briew kiba die ialade,” ula ong.Haba iadei bad ka jingshah rem ka Congress ha ka ilekshon MDC ha KHADC, u Mathew ula ong ba ia kane ka jingshah rem ym dei ban kynnoh ia u President ka MPCC u bah Vincent Pala, namar ba ia ka KHADC ilekshon la peit la khmih da u bah Ronnie hynrei ym shym la poi pyrkhat ba un shet kylla.