Jurip ki MLA ia ka jingkieng Ranikor bad iasoh bad ka Mawsynram

U MLA ka Ranikor, Bah Pius Marwein bad u MLA ka Mawsynram, Bah Olansing Suin ha kine ki khyndiat sngi ki la hiar jurip ia ka jingkieng Wah Balat, ka jingkieng kaba donkam bha na ka bynta ki paitbah katei ka thaiñ namarba ka pyniasoh ia ka shnong Dangar kaba hap hapoh ka Mawsynram Constituency, East Khasi bad ka shnong Balat kaba hap hapoh ka Ranikor Contsituency, South West Khasi Hills District. Kane ka jingkieng ka long kaba kongsan bha na ka bynta ka roi ka par jong ki paitbah ha baroh ar tylli ki Constituency namar ba ka don ha syndah jong ka iew Balat, kawei na ki iew heh tam ha South West Khasi Hills District bad tang 4 KM na Balat, ka la don ka haat khappud kaba don ha Lalpani hajan ka shnong Dangar, East Khasi Hills District.Hynrei ka jingkieng kaba rim halor kane ka wah ka la tor bha, bad la hap ban khang ruh ia ki kali heh ban iaid lyngba namar ba ka la synjor palat bad kumta ka la wanrah shibun ki jingeh ia ki paitbah kiba leit sha katei ka iew bad kiwei kiwei ki jaka.

Kumta ka sorkar Meghalaya lyngba ka tnat PWD la mynjur ban mang haduh T.7.97 klur na ka bynta ban shna ia ka jingkieng 2-laiñ halor katei ka Wah Balat lyngba ka State Scheme. Ia ka tender ban trei ia katei ka kam la aiti sha u kontraktor bad la khmih lynti ba yn pyndep ia ka jingtrei hapoh 24 bnai.Haba kren bad ki lad pathai khubor hadien ba la dep ban jurip, u bah Pius Marwein u la ong ba u la pynpaw ia ka jingkmen ba ka sorkar ka la ai jingmynjur na ka bynta ban shna ia katei ka jingkieng kaba ki paitbah katei ka thain ki ju angnud la bun bun snem. Da ka jingdon lang ruh u kontraktor ha kane ka jingleit jurip, u MLA ka Ranikor u la kyntu ïa u ban pynkloi ïa ka jingtrei bad ban pyndep ïa ka jingtrei ha ka por ba la buh khnang ba kan long ka jingmyntoi ïa ki paidbah jong baroh ar tylli ki konstitwensi.

U MLA ka Mawsynram, u bah Olansing Suin u ai khublei ia ka sorkar MDA-2 hapoh ka jingialam jong u Myntri Rangbah ka jylla, u Conrad Sangma bad u Deputy Chief Minister ka tnat PWD (Roads), Bah Prestone Tynsong kiba la ai jingmynjur ban tei ia kane ka jingkieng kaba pyniakhlad ia ka East Khasi Hills District bad ka South West Khasi Hills District.