Nalor ka jingpynbna paidbah, yn phah Message ha Mobile ka tnat lada pynlip bording

U Commissioner Secretary ka tnat Bording u Sanjay Goyal hynne ka sngi ula pyntip ba ka tnat ka dang pynkhreh ia ka rukom pynbna paidbah haba ia dei bad ka Plan ban pynlip bording (Load Shedding) ha ki katto katne ki jaka hapoh ka Jylla. Ïa kane u Commissioner ula pynshai haba ia dei bad ki jingujor ba la ioh pdiang ba ka tnat kam shym la pyntip lypa, lada don kano kano ka jingpynip bording (Load Shedding) kaba buh jingeh ia ki paidbah. Haba kren shaki lad pathai khubor u Commissioner ula ong ba haduh mynta ka Meghalaya ka dang pahuh ka jingpynmih bording hynrei ula kubur ruh ba kan don ka jingpynip bording lada ki nongtrei ka MeECL, ki donkam ban maramot ne bujli ia ki wire, Transformer bad kiwei kiwei.

U Sanjor Goyal ula ïathuh ba mynta la ar snem tam ka Meghalaya kam sakhi shuh ka jingpynlip bording (Load Shedding) da ki kynta kumba ju long ha ki snem ba la leit hynrei ka jingpynlip bording kan don satang lada don ka jingmaramot ne pynbha ia ki rukom sam bording. Ula ong ba ka dawbah ba pynlip bording malu mala ka dei hi namar ka jingdkut ki Wire namar ka jinghap ki tnad dieng ba shah lynshop ha ka bor mariang.

“Lada don ka jingot bording daki kynta, ka MeECL ka pyntip lypa sha ki paidbah da kaba pynmih ia ki jingpynbna paidbah ha ki kot khubor bad kiwei kiwei ki rynsan pynbna paidbah hynrei mynta ka tnat bording ka dang pynkhreh ruh sa da kiwei ki lad ban pynbna paidbah lada don ka jingot bording lada don ka jingmaramot ne jingpynbha ia ki Line sam bording” la ong u Sanjay. U Sanjay ula ïathuh ba mynta ka tnat ka dang pynkhreh ban pynbha ia ki Mobile Phone jong ki nongpyndonkam bording khnang ban lah ban phah jingpyntip (Message) sha ki, lada ka don ka jingot bording.