Ka shnong Nongrim Warding kan khring ïa ki nongshangkai pyrthei

Ka shnong Nongrim Warding kaba hap hapoh ka Hima Dwar Nongtyrnem ka dei kawei na ki shnong ka ban sa khring bha ia ki briew ban wan jngohkai ha kane ka shnong. Ha kane ka shnong ka don ia kiba bun ki khana hyndai kum ka khana u ‘Khyndai khoh shiang- u maw thep khlieh shipai’, ka kynroh ba heh kat ka Jerusalem bad u maw dak khlieh. Kane ka shnong ba jngai palat 100 km na sor Shillong,ka don shibun ka spah kaba la ai kyrpang ka mariang naduh ka rep ka riang, ki lum ki riat, ki khlaw ki btap haduh ka khana hyndai ba bun rukom. Ha ka jingiakren bad uwei u riew rangbah na kane ka shnong u bah Phorslandjune Kariang, ula iathuh ba katkum ka khana hyndai, ki briew mynshwa kila bret ia ki khlieh ki shipai phareng kiba wan hiar thma ia katei ka jaka.

U la iathuh ba mynshwa, ki briew ka Nongrim Warding haba ki tip ba ki shipai phareng kin wan hiar thma ia ka shnong, kila shet da ka kyiad da uwei u phan lyngkhui uba long bih bad ynda ka la ih ka la biang, baroh ki ia leit rieh noh bad ieh kumto ia ka kyiad hapoh ka iing bad ki shipai phareng mar synrung ha iing, tang shu iohi bad sma iwbih ka kyiad kila kynrup pynsted wut wut ban iadih hynrei kim tip ba ka dei ka kyiad bih. Tang shiphang kila buaid bad thiah lyngktar bad iap syndon namar ba u phan lyngkhui uba ju khot ha katei ka shnong, u don ka bih kaba khlain bha bad hadien kila iap, ki ia mih na jaka rieh bad khrai ia ki khlieh ki shipai phareng bad thep haduh 9 tylli ka khoh shiang kaba heh bha bad leit bret ha katei ka krem kaba don ha wah Weiswai.

Ha kane ka wah weiswai, ha syndah kane ka krem bret khlieh, ka don sa kawei ka khana kaba naduh hyndai, ha kaba ki tymmen ki la ai kyrteng lai tylli ki pung, kawei ka dei ka pung shynrang kaban sum ki shynrang, kawei ka pung kynthei ban sum ki kynthei bad kawei pat ka pung khynnah kaban sum ki khynnah.Ym tang katta, hajan kine ki pung, la don sa uwei u mar uba khampher, uba ki briew kane ka shnong ki khot kum u maw dak khlieh, ha kaba la iathuh ba katkum ka khana hyndai, la kit ia une u maw bah da u briew ha khlieh bad la sah ka dak kaba them kaba la pynshong da ka khlieh halor jongu bad na kane ka daw, ki khot maw dak khlieh. Shuh shuh nalor kine, u bah Phorslandjune Kariang ula iathuh ba ka Hima ka don ruh ka kynroh kat kynroh Jerusalem kaba la tei mynshwa ban khang lad ia ki shipai phareng bad ban hiar thma ruh ia ki bad kane ka kynroh ka don kham jngai na shnong ha ka jaka kaba khot ka lad lynti sha Thyllaw bad Nongrim Warding. Na ka jingdon kine ki khana Hyndai, ka shnong Nongrim Warding kan long kawei na ki jaka jngohkai kaban sa khring ia ki briew khamtam ynda la dep ban shna ia ka surok kaba dang sorjamin mynta. Ia mynta ki briew ki hap ban kit ban bah da ka met namar ba ka ropeway ruh dang shna.