Ai jinghikai ka Food Safety, NASVI bad Nestlé India ia ki nongdie marbam ha surok ban lehkhuid

Da kaba pyniar ia ka Project ‘Serve Safe Food’ ha Meghalaya, ka Nestlé India ka la bteng ia ka jingiatreilang bad ka Food and Drug Administration, Meghalaya, bad ka National Association Street Vendors of India (NASVI) ban ai jinghikai ïa palat 300 ngut ki nongdie marbam ha surok ha East Khasi Hills ban pynlong ïa ka jingdon ki nongdie marbam ha ka jylla haduh palat 1,800 ngut. Ka projek ‘Serve Safe Food’ ka la dep ban ai jingmyntoi ia palat 92,800 ngut ki nongdie marbam ha surok ha kylleng ki 26 tylli ki jylla bad 4 tylli ki Union Territories da kaba hikai ia ki nongdie marbam shaphang ka koit ka khiah, ka jingkhuid ia ki marbam ban shngain ki paidbah, ka jingpynkhuid ia ki jaboh bad ka jingseng kam seng jam. Ka prokram ai jinghikai ka pynkhreh ia ki nongdie jingdie da ka jingnang jingstad ban pynbha ia ki rukom pyniaid ia ki marbam.

 Ka Kong DBS Mukhim, Deputy Commissioner (Enforcement), Food Safety, Govt of Meghalaya, ka la ong, “Naduh ki jingphylla ba phylla jong ka mariang – ki wahduid bad ki krem haduh ka kolshor ba im bad bapher ki briew jong ka, ka jylla ka la kylla long ka paradise jong ki nongleit jingleit. Ka jingbam lynti jong ngi ka long ka bynta ba kongsan jong kane ka kolshor bad ngi thmu ban pynkhlain shuh shuh ia ka. Nga sngewnguh ïa ka jingïatreilang hapdeng ka National Association of Street Vendors of India (NASVI), Commissionerate of Food Safety, Govt of Meghalaya bad ka Nestlé India ha Meghalaya kiba la ïarap ïa ngi ban pynurlong ïa ka jingthmu lyngba ka projek ‘Serve Safe Food’.”

Ka Dr. Taruna Saxena, ka Head, Sustainability bad societal initiatives, ka Nestlé India ka la ong, “Ha Nestlé India, ngi pyrshang beit ban pynbha ïa ka jinglong jingman ki jingbam ha India da kaba ïaid lait ïa ka jingbha bad jingshngaiñ jong ki mar jong ngi hi. Ka Project Serve Safe Food ka ai bor ïa ki nongdie marbam ha surok da kaba kyntiew ïa ka jingtbit lyngba ki jinghikai ba ïa dei halor ka jingkhuid jingsuba bad ki rukom ïada ïa ki marbam. Kane ka iarap ban pynbha ia ka jingsngewthuh jong ki ha kylleng ki jaka halor ka jingkoit jingkhiah bad ka jingkhuid jingsuba jong ki marbam. Ngi la nang pynheh ia ka Projek bad ngi ngeit skhem ba kan wanrah ia ka jingkylla ha ka jinglong kaba bha katba nangmih ki sngi bad kan iarap ia ka jingroi bad jingpynneh pynsah ki kam jong ki baroh kawei.

 Ka Nestlé India ka la sdang ïa ka Project Serve Safe Food ha u snem 2016 bad ka la ai jinghikai ïa ki nongdie marbam ha surok ha kylleng ki jylla ba kynthup ïa ka Assam, Andhra Pradesh, Arunachal Pradesh, Andaman bad Nicobar Islands,  Bihar, Chhattisgarh, Delhi, Goa, Gujarat, Haryana, Himachal Pradesh, Jammu and Kashmir, Jharkhand, Karnataka, Kerala, Madhya Pradesh, Maharashtra, Manipur, Meghalaya, Nagaland, Odisha, Puducherry, Punjab, Rajasthan, Sikkim, Tamil Nadu, Telangana, Tripura, Uttar Pradesh, bad Uttarakhand.