Dawa ka JSU ban pynlong Summer Capital ia ka Jowai

Ka Jaintia Students Union (JSU) hynne ka sngi ka leit ban aiti ia ka dorkhas sha u Lat ka jylla u CH Vijayashankar ban pynsngew halor ka jingdawa ban pynlong ia ka Jowai kum ka Summer Capital jong ka jylla bad ka Inner Line Permit (ILP). Haba kren sha ki lad pathai khubor, u President ka seng u bah Jersom Shylla ula ong ba ka soarkar ka la dei ban pynlong ia ka Jowai kum ka Summer Capital namar ba ka Jaintia kadei ka District kaba nyngkong eh ha ka jylla bad ki donkam ban don ia ka roi ka par. Ula ong ba lada ki Garo ki dawa ban ioh ia ka Winter Capital,  ki ruh ki don ia ka hok ban ioh ia ka Summer Capital.

“Ngi dawa ban pynlong ia ka Jowai kum Summer Capital namarba lada peit ha ka jingnang jingstad ruh ngi dang duna bha namar haduh mynta tang kawei ka Govt kolej, ha ka koit ka khiah ruh ngi dang duna ka jingdon jong ki hospital sorkar,” ula ong. U President ka JSU, ula ong ba ka Jaintia Hills haduh mynta ka noh synniang haduh 30 percent sha ka ioh ka kot ka jylla bad kadei ka jaka kaba pynmih haduh 70 percent u dewiong. “Haba ka Jaintia ka la noh synniang shibun sha ka sorkar, hynrei balei ia ka roi ka par shu rah beit tang sha Garo bad Khasi Hills. Ka sorkar kam dei ban niew shilliang khmat ia ka Jaintia,”ula ong.

Ula kyntu ruh ia ki nongmihkhmat na Jaintia ba lada ki don ka jingsngewkhia kidei ban rah ia kane ka mat ban iakren ha Iing Dorbar Thawain ka jylla kaban sa sdang shen ha kine ki khyndiat sngi. Ha kajuh ka por, ka seng ka la pynsngew sha u Lat ka jylla halor ka mat Inner Line Permit (ILP) kaba dang sahteng watla ia kane ka mat la pas da ka Iing Dorbar Thawai ha u 2019 hynrei kaba sngewsih ka long ba kane ka mat kaba dang sahkut bad ka sorkar pdeng.