Hadien 17 snem pynkut ka High Court ia ka mokutduma tah sialieh pyrshah ia ka Kong Ampareen

Hadien 17 snem ka Meghalaya High Court ka la pynkut noh ia ka mokutduma tah sialieh pyrshah ia ka MLA ka Laitumkhrah constituency ka Kong Ampareen Lyngdoh kaba dei ruh ka Myntri Sorkar Jylla. Lah ban kdew ka Myntri Sorkar ka Kong Ampareen Lyngdoh ka la shah kynnoh donkti leh tuh tah sia lieh halor ka jingthungkam nonghikai ha u snem 2008.Haba kren sha ki lad pathai khubor ka Kong Ampareen Lyngdoh ka la ong ba ha ki 17 snem, ma ka bad ka iing ka sem jong ka ka la shah kynthoh lai phew jait namar ka jingshah kynnoh donkti ban leh tuh ban thungkam nonghikai skul.Ka Kong Ampareen ka la ong, naduh ba shah kynnoh ba don bynta ban lehtuh ha ka kam thung nonghikai, kam ju pyni nia ne kam ju mih ban pynksan ia lade halor kane ka mat namar ka shaniah ha ka ain bad ha ka Iingbishar.

“Ka Meghalaya High Court mynta ka sngi ka la pynbna ba kam don satia kano kano ka jingleh thok ne ka jingpyndonkam sia lieh (White Ink) haba ia dei bad ka jingthungkam nonghikai ha u snem 20008” la ong ka Kong Ampareen.Haba pynpaw ka jingsngewkmen bad ka jingshaniah ia ka Iingbishar ka Kong Ampareen ka la ong, “Ka rai jong ka Meghalaya High Court mynta ka sngi ka la pynskhem ia ka nongrim kaba nga ieng bad nga ai khublei ia baroh kiba la don lang bad nga ha kine ki 17 snem”.

Ka la ong, ba haduh mynta kam pat ju pyndonkam bakla ia ka bor, kum ka Myntri Sorkar ne kum ka nongmihkhmat jong ka constiteuncy.Na ka liang ka Lawyer ka Sanchita Ain, ka la ïathuh ba haduh mynta ka Iingbishar kam pat pynmih ia ka hukum hynrei ha ka jingpynbna ia ka hukum, la kdew ba baroh mokutduma pyrshah ia ka Kong Ampareen Lyngdoh la pynkut noh.Halor ka jingkylli ka Lawyer ka Sanchita Ain ka la ong “Ka CBI ka don hok ban ujor sha Supreme Court pyrshah ia ka hukum jong ka Meghalaya High Court hynrei ngi ruh ngi long kiba la pynkhreh ban iakhun ha Supreme Court lada don ka jingujor”.