Ka ‘Farmers Front’ ka thong jong ka NPP ban iarap ia ki nongrep

Da ki phew ngut ki nongrep na West Jaiñtia district hynne ka sngi ki la wan ban sakhi ha ka jingpynskhem ia ki nongialam ka NPP Farmer’s Front bad ka NPP Block Farmers Front ba long ha Dorbar Shnong Mynthong Community Hall . Ia kine ki nongialam la pynskhem da u Chairman ka NPP Farmers Front u Bah Himalaya M.Shangpliang bad u Secretary u Bah Eugene Kurkalang ha ryngkat ka jingdonlang u bah Weiladmiki Shylla u MLA ka thain bad kiwei de ki nongialam. Ha kane ka sngi la pynskhem ia u Bah Mutshuwa Thabah kum u President ka NPP District Farmers front u Bah Damechwa Dhar kum u Secretary bad la aiti ruh ia ki syrnod sha ki nongkitkam ha ki Block bapher bapher kiba hap hapoh ka District.

Haba kren ha kane ka sngi u Bah Shangpliang bad u Bah Eugene Kurkalang, ki la pynshai sha ki nongrep ba ka thong ba ka NPP ka la buh ia kane ka Farmers Front, ka long na bynta ban iarap kyrpang ia ki nongrep hapoh ka jylla. Ki la ong ba lyngba kane ka Farmers Front yn lum jingtip ia ki jingeh ba ki nongrep ki iakynduh bad kin sa thaw ia ki lad ki lynti ban iarap kyrpang na ka bynta jong ki. U Bah Shangpliang ula ong ba ka sorkar NPP ka dei ka sorkar kaba phai khmat sha ki nongrep ha ka jingialam u Myntri Rangbah u Conrad K. Sangma bad u Bah Prestone Tynsong kum u symbud myntri da kaba ki la buh ia kane ka shnat treikam ka long ban phai khmat kyrpang tang na ka bynta ban iarap kyrpang ia ki nongrep da kaba kin thaw ia ki skhim bapher bapher ban myntoi ki nongrep.

Ula ong ba ka sorkar ka la thaw ruh ia ka farmers Front khnang ba kin long kum ki shipai jong ka NPP ba kin lah ban iakhun ia shibun ki jingeh haba iadei bad ka Farmers Front kumjuh iaka Party NPP. Ha kajuh ka por, ula ong ba ka skhim Focus bad ka CM assure, CM elevate kidei ki skhim kyrpang ba la buh na ka bynta ki nongrep bad nalor kata ka sorkar ym tang ba kan ai ia kita ki lad jingiarap sha ki nongrep, hynrei kin thaw lad ruh ban don kata ka iew ka hat namar kum ki nongrep lada ym don dor ki mar ki mata kin nym ioh jingmyntoi satia, u la bynrap. Katba na ka liang u bah Wailad, ula ai jingiaroh ia ki nongialam jong ka farmers front kiba la trei shitom na bynta ka bha ka miat jong baroh ki nongrep.