Shah ot u samla na ryndang, hiar tohkit ki pulit ha Mawlyntriang

Kawei ka jingjia ba sngewtriem bad pynpar niangkhriat ia ki paidbah ba uwei u samla ba la tip kyrteng u Bunsiewdor Nongrang 30 snem na shnong Mawlyntriang, ula shah ot na pdot ha kawei ka ïing ba dang shna bym pat don ba sah, kaba dei ka ïing ki kmie ki kpa jong u hi. Katkum ka jingïathuh u sordar ka shnong Mawlyntriang, ula ong kane ka la jia ha ka por 5 mynstep ha ka 6 tarik u nailur 2025 ba u la ïoh ïa ka phone na u president ka VDP, uba la pyntip ia u ban wan sha Nongkhlaw CHC ba don uba mynsaw bad uba shah ot pdot ne ryndang.

U sordar u la ïathuh katkum ka jingïathuh kiba ha ïing utei u samla, la ong ba dei ha ka por kumba 3 shiteng mynstep jong ka 6 tarik u Nailur 2025 ba une u samla ba shah ot ryndang u la wan tied jingkhang ha ïing kiba shipara ar kmie bad haba kita kiba ha iing ki la ïohi ïa ka jingmynsaw jong u bad ki la pynkit noh mar mar sha Nongkhlaw CHC ban ïoh ïa ka jingsumar hynrei kham hadien la pynkit noh sha Nazareth hospital Shillong bad mynta u don ha ICU.

U sordar ka shnong Mawlyntriang ula kyntu ruh ïa ki bor jong ka ain ba kin shimkhia ban lap dien ïa u ne kiba leh ïa kane ka kam sniew bad ula kyntu ruh ba uno uno ne kino kino kiba leh ïa kane ka kam runar kin sngewbha ban wan ai ti noh hi ïa lade.Halor kane ka jingjia ki pulit ki la hiar sha katei ka shnong bad sha katei ka jaka ban pynlong ïa ka jingtohkit bad nalor ki pulit la wan hiar ruh ka Forensic Crime Scene Unit bad ka kynhun pulit MLP K-9.