Buh jingkylli u Bah Adelbert ba shah pynkynriah jaka shong hapoh Ïingdorbar

U MLA North Shillong u Bah Adelbert Nongrum uba shah sospon haka Voice of the People Party (VPP) ula buh ka jingkylli halor ka jingshah pynkynriah naka jaka ba u ju shong man ka por hapoh ka Iingdorbar Thaw Ain. Haka sdang ka Dorbar Synrai jong ka Iingdorbar Thaw Ain, la iohi ba u Bah Adelbert ula shah pynkynriah naka jaka ba ju shong ki MLA ka Liangpyrshah ka VPP. Haba iadei bad kane, u Bah Adelbert ula pynpaw ia ka jingbym sngewtynnad bad ula buh ka jingkylli na u Lamphang ka Iingdorbar Thaw Ain. “Nga lah ban pan jingshai balei ba ma nga kum u MLA ka VPP nga hap ban mad ia kane. Balei ba phi phah shong ia nga sha ka shuki ba hadien duh” la kylli u Bah Adelbert. Haba iadei bad kane u Lamphang ka Iingdorbar Thaw Ain u Thomas A Sangma ula kylli ia u Bah Adelbert ba hapoh ka rule aiu ba u buh ia kane ka jingkylli.

Naka liang u Bah Adelbert ula pynshai ba u khlem buh satia ia ka jingkylli hynrei u pan jingpynshai halor ka jingshah sospon jong u.Naka liang u Lamphang ula kular ba un sa khmih ia kane ka kam daka ba ong “Kam iahap satia ban iakren ia kane ka kam hapoh ka Iingdorbar”.Hadien ba wai ka Dorbar, naka liang u Lamphang ula lum ka jingialang ba kyrkieh ban pynbeit iaka jingujor u MLA ka North Shillong constituency. Haba kren shaki lad pathai khubor u Lamphang ka Iingdorbar Thaw Ain u Thomas A Sangma ula ong ba ula rai ban bteng ha ka ban ithuh ia u MLA ka North Shillong Bah Adelbert Nongrum kum u dkhot ka Voice of the People Party (VPP) haba pynpaw ba ka shithi sospon, kam dei kaba la phah sha u kum u MLA.

“Nga la ioh pdiang ia ka shithi (sospon). Ka dei ka jingshisha ba ula shah sospon na ka party hynrei ngam lah pat ban pdiang ia ka naba ka shithi sospon bala phah sha nga, la phah sha u Bah Adelbert Nongrum, tang kum u Adelbert Nongrum (Jaiaw). Ki lah ban don bun ki Adelbert Nongrum kiba sah ha kajuh ka shnong” la ong u Lamphang.