Rai pule bniah shuwa ïa ka kaiphod jong ka Expert Committee halor ka Bhah kam

U Nongaiktien ka sorkar jylla u bah Paul Lyngdoh ula iathuh ba ka sorkar hynne ka sngi ha ka jingialang jong ka kynhun Myntri, ka la rai ban pule bniah shwa ia ka kaiphod jong ka Expert Committee halor ka bhah kam bhah jam ne ka State Reservation Policy. Haba kren sha ki lad pathai khubor, u bah Paul ula ong ba ka Expert Committee, ka la aiti ia ka kaiphod sha ka sorkar jylla ha u bnai Jylliew, 2025. U bah Paul ula iathuh ba kane ka kaiphod ka don da ki hajar tylli ki sla bad ka sorkar ka donkam ban pule bniah bha ha shwa ba kan shim ia ka rai namar ba kadei ka kaiphod kaba jrong bha.

“Ha ka jingialang ka cabinet mynta ka sngi, ngi la rai ban pule bniah shwa ia ka kaiphod jong ka Expert Committee on State Reservation Policy kaba iadei halor ka bhah thungkam ka jylla namar ba ka dei ka kaiphod kaba jrong bad kaba rben bha kaban shim por ban pule namar ba ki don ki jingai jingmut kiba thymmai bad ki don kiba rim ruh,” la ong u bah Paul. U nongaiktien ka sorkar u bah Paul Lyngdoh ula iathuh ba ka cabinet kan sa iathir kiei kiba donkam ban leh bad kiei ki bym dei ban pdiang hadien ba la pule bniah ia kane ka kaiphod. Ula ong ba ka sorkar ka don ia ka bor ban pdiang ne ban kyntait ia ki jingai jingmut, bad ia ka rai yn sa shim hadien ka jingbishar kaba bniah bad ka jingiasyllok.

Ula ban jur ba ka Sorkar kan shim ia ka lynti kaba pynbiang tarajur, haba buh hakhmat ia ki jingai jingmut jong baroh ki kynhun. Ha kajuh ka por, u nongaiktien ka sorkar jylla u bah Paul ula iathuh ba ka jingialang kynhun Myntri ka la mynjur ruh ia ki bill ne ainrew kiba kynthup ia ka Meghalaya Amendment Heritage Act 2012, Meghalaya Goods and Services Act 2017, Meghalaya Private Colleges Promotion and Regulation Bill 2025, Meghalaya State Language Act, 2005, Meghalaya Homeopathic Medicine amemndment Bill, nalor kiwei de.