Ka surok Mawshabuit sha Happy Valley ka dei jong ki shipai

U Symbud Myntri Rangbah ka jylla uba khmih ruh ia ka tnad PWD u bah Prestone Tynsong, ula iathuh ba ki shipai ki don ia ki kot ki sla ban pynshisha ia ka jinglong trai ia ka surok kaba 600 metre na Mawshabuit sha Happy Valley. Ia kane u bah Prestone ula jubab ha ka kynta kylli jingkylli ba la wanrah da u MLA ka Mawryngkneng u bah Heavingstone Kharpran hynne ka sngi ha Iing Dorbar Thawain ka jylla. Haba iadei bad ka jingmaramot ia katei ka surok kaba 600 metre, u bah Prestone ula ong ba kane ka jaka ka hap hapoh ki shipai bad ia ka jingmaramot ruh la leh da ki shipai hynrei lada ki shipai kim lah ban maramot ka sorkar ka kloi ban maramot hi da lade. “Lada ki shipai kim lah ban maramot ia ka surok, ka sorkar kan sa maramot hi bad shen nga tikna ba ngin ioh ia ka NOC na ki shipai ban maramot ia katei ka surok kaba 600 km,”ula ong.

Ha kajuh ka por, u Symbud Myntri Rangbah ula pyntip ba ka sorkar ka la don ia ka jingthmu ban shna da ka Eastern Bypass na Sohryngkham sha Mawshabuit-Mawlynrei kaba ka jingjngai ka long kumba 9.5 km, khnang ban lah ban weng noh shirta ia ki jingeh jong ki paidbah kiba leit ba wan bad ban pynkylluid ruh ia ka nongbah Shillong. “Ka sorkar ka wad ia ki lad ki lynti ban shna ia katei ka surok khnang ba ki paidbah kin nym donkam ban iaid lyngba ka khyrdop shipai,” ula ong. U bah Prestone ula pyntip ruh ba wat ki bor shnong ki la ai sngewbha sha ka tnad PWD ba ki kloi ban ai jaka na bynta ban thaw lad ban shna ia ka surok ba thymmai na Mawshabuit sha Mawlynrei.

“Ngi la dep pynlong ia ka jingsurbe bad ka jingjngai ka long 4 km na Mawshbuit sha Mawlynrei bad na katei ka jingjngai ka surok, 300 meter ka hap hapoh ka jaka shipai bad mynta ngi la iakren bad ki bor shipai ba kin shah iangi ban shna ban pyniaid ia ka surok” ula ong.Ula kyntu ia u MLA ka Mawryngkneng ban don bynta ban iatreilang ban pynurlong ia kane ka surok.U Bah Prestone ula ong ba ynda ladep shna ia kane ka surok, ki kali kim donkam shuh ban rung lyngba na Shillong bad kane kan pynkylluid ruh na ka jingkhapniah.