Leit jurip u Conrad ia ka Lady Kerr Welfare Centre

U Myntri Rangbah ka jylla u Conrad K Sangma ryngkat bad u MLA ka South Shillong Constituency u Bah Sanbor Shullai hynne ka sngi kial leit jurip ia ka Lady Kerr Welfare Centre ha Laban, Shillong.Ha katei ka jingjurip u Myntri Rangbah la iadonlang ki dkhot jongka Indian Red Cross Society, Meghalaya State Branch bad ki nongtrei jongka Welfare Centre.Ka Lady Kerr Welfare Centre kadei kaba la sdang naduh u snem 1920 kaba dei ruh ka iing jongka Indian Red Cross Society (IRCS), Meghalaya Chapter bad ka Red Cross Maternity Home kaba la don palat iaka 100 snem kaba rim bad kaba la jot bha. Ka IRCS, Meghalaya kala kyrpad ia ka jingtuklar bad ia ka jingkyrshan na ka sorkar jylla ban shna maramot bad ban shna pynbha ia kane ka Centre.

Ka IRCS kala pynapw ba “Ka Red Cross Society, Meghalaya Chapter kala ai ia ka jingshakri ha ka koit ka khiah khamtam ia ki khynnah bad ban sumar ia ki longkmie kiba pun khun bad khamtam eh ia kiba duk ba kyrduh bad kiba shah iehbein ha ka imlang sahlang ha ryngkat bad ka ai ia ka jingiarap bad jingkyrshan ha ka por ba donkam kyrkieh, jingiakynad bad kiwei kiwei ki jingjia”.U Conrad K Sangma, hadien ka jingsngap ia ka jingsngewkhia jong ka IRCS bad ka jingleit jngoh ia ka Centre, ula ong ba ka IRCS, Meghalaya, kadei ka community health society kaba kongsan bha ha ka imlang sahlang.

“Ki Community Health Societies bad ka sorkar ki lah ban iatreilang ban don ia kajuh ka thong, ban sam lang ia ki jingdon jingem bad ka jingshemphang ban kyntiew ia ka koit ka khiah ki paidbah. Ka sorkar ka lah ban plie lad ban don ia ka jingiatreilang ban thaw ia ki polisi kiba ai jingkyrshan, ban pynbiang ia ka pisa ka tyngka bad ban pyniasoh lang ia ki jingpyrshang ha ka imlang sahlang ha kaban ai jingsumar ia ki paidbah” la ong u Conrad Sangma. Ula bynrap ba ka jingiatreilang hapdeng ka sorkar bad ka Lady Kerr Welfare Centre kaba la pyniaid da ka IRCS, Meghalaya ka lah ban wanrah ia ka jingkylla ha ka liang ka koit ka khiah. U Myntri Rangbah ula pynthikna ia ka Society ba ka sorkar kan ai iaka jingiarap ha kaban shna maramot ia ka iing bad ka sorkar kan wad ia ki lad ki lynti kiba lah ban iatreilang na ka bynta ka bha ka miat kaba salonsar ha ka liang ka koit ka khiah ia ka imlang sahlang.