Pynsngew u MLA Amlarem bym biang bording

U MLA ka Amlarem u bah Lahkmen Rymbui ula ong ba ha ki jaka sor bun ki briew ki ju kwah ban leit bamja miet da kaba thang mombati kaba ju khot ‘Candle Light Dinner’ hynrei ha ka konstitwensi jong u, man ka miet ki ju bamja da kaba thang mombati namar ka jingbym don bording.Ia kane u bah Lahkmen, u la kren halor ka jingkylli kaba ula wanrah hynne ka sngi hapoh ka iing dorbar halor ka jingduh bording ba khah khah ha ka thain Amlarem khamtam ha ka thain Bakur, Dawki.“ Namar ka jinglip bording khah khah, man ka miet ki paidbah ka Amlarem ki ju don ka jingbam ja Candle Light Dinner,” ong u bah Lahkmen.U bah Lahkmen ula ong ba kane ka thain ka don ia ka Leskha projek kaba pynmih bording hynrei balei ka bording pat kam ju meh thikna.Haba jubab halor kane, u Myntri ka tnad bording ka jylla u AT Mondal ula ong ba bun na ki jaka hapoh ka Amlarem Sub-Division bad thain Bakur-Dawki-Darrang, ka jinglip bording ka dei na ka jingjur slap, jur lyer ha kaba ktah ia ka jingpyniaid bording na ka jingkhyllem ki dieng, ki siej bad ktah ia ki waiar.

U Myntri ula pyntip ruh ba ki don haduh 16 ngut ki linemen/jugali hapoh ka Amlarem sub-division.Haba kubur ia ka jingong u MLA, u Myntri ula ong ba ka tnad bording ka dang pynbha ia ka bording naduh ka jingmaramot ia ka line, ki transformer bad kawei ruh ka don tang kawei ka control room ha ki 3 tylli ki sub-station, bad kane ka la pynthut ia ka jingtreikam.Hadien kane, na ka liang u MLA ka TMC na Rajabala u Mizanur Kazi ula ong ba ka konstiwensi jongu, kadei ka konstiwensi kaba marjan bad ka konstiwensi jong u Myntri ka tnad bording bad la khmih lynti ba ka bording kan long kaba biang, hynrei phewse, ki ruh ki mad ia kajuh ka jingeh kumba long ha Amlarem.Ha kajuh ka por, ula buh jingkylli bynrap, haba mudui sha ki ophisar ym ju don ba shimkhia ia ki jingeh jong ki.

Halor kane, u Myntri Rangbah u Conrad uba la iarap ban jubab, ula ong ba ka sorkar ka la buh ia kawei ka rukom pyniaid lyngba ka online bad lada kino kino kiba kwah ban pynsngew ia ki jingeh, ki lah ban phone ha u nombor 1971. “ Kino kino ki lah ban phone ha u nombor 1971 ban pynsngew ia ki jingeh jong ki bad ki lah ruh ban wad jingtip haba iadei bad kino kino ki skhim sorkar,” ong u Conrad.