Namar ym pynieng kyrtong ka Liang Pyrshah, yn shimti u Limison iaka shuki Deputy Speaker

Ka National People’s Party (NPP) hynne ka sngi ka la tyrwa da ka kyrteng jong u MLA ka NPP na Raksamgre constituency u Limison D Sangma ban shimti iaka shuki Deputy Speaker ba thymmai jong ka Iingdorbar Thaw Ain ka Jylla.Lah ban kdew baka shuki Deputy Speaker kala thylli noh hadien ka jinghiar shuki noh u Timothy D Shira haka 8 tarik Nailur 2025.Ia ka kyrteng jong u Limison D Sangma la tyrwa da ki MLA jong ka NPP ba kynthup ia Marcuise N Marak bad u AT Mondal kiba dei ruh ki Myntri Sorkar ka Jylla.

Ia kane ka kyrteng jong u Limison la phah hynne ka sngi sha ophis treikam jong u Lamphang ka Iingdorbar Thaw Ain ka Jylla.Kumba long haduh mynta watla ka por thep thep ka kut haduh ka por 4 baje hynrei na ka liang ka ophis jong ka Assembly ka la pyntip ba ki ioh pdiang tang ka kyrteng u Limison na ka bynta ka shuki Deputy Speaker.

Haba kren shaki lad pathai khubor u Myntri Rangbah ka Jylla Bah Conrad K Sangma u la pyntikna ba u Limison D Sangma u dei u kyrtong monlang jong ka Meghalaya Democratic Alliance (MDA 2.0) na ka bynta ban shimti ia ka shuki Deputy Speaker jong ka Ïing Dorbar Thawain ka jylla.U Conrad u la iathuh ba ia kane ka rai la shim hadien ka jingiasyllok jong baroh ki nongialam kiba la mynjur ba u Limison u la dei hok ban bat ia katei ka shuki namar u dei u nongmihkhmat ba la Rangbah bad uba la don jingtbit ruh ha ka kam.”Kum u briew uba la Rangbah ha ka kam ngi kyrmen ba u dei uba biang tam ban bat ia kane ka shuki” la ong u Conrad.