Ther u Dr Mukul ia ka sorkar MDA, ba pynkylla Private ia ka Tura Medical Kolej

U nongialam ka liangpyrshah u Dr. Mukul Sangma ula ther tyngeh ia ka sorkar MDA kaba la pynkylla ia ka Tura Medical College sha ka Private Medical College.Haba wanrah ia kane ka mat ha Iing Dorbar Thawain ka jylla, u Dr. Mukul ula ong ba ha ka jingshisha, ia kane ka college la rai ka sorkar mynshwa ha ka por ba long Myntri Rangbah ma u, ban dei ka Tura Government Medical College hynrei hadien ba la wan ka sorkar MDA kaba ialam u Conrad K Sangma, ka la pynkylla noh sha ka Private Medical College katba ia ka Shillong Medical College la pynkylla sha ka Government Medical College kaba la rai mynshwa ban long ka Private Medical College.

Na ka liang u Dr Mukul ula maham tyngeh ia ka sorkar ba lada kam pynneh ia ka rai kaba mynshwa ban pynlong ia ka Tura Government Medical College, kan wanrah ka jingpyrshah kaba jur na ki paidbah ka rilum Garo.Katba na ka liang u Myntri Rangbah ka jylla u Conrad K Sangma haba iarap pynshai ula ong, watla ka sorkar ka aiti ban pyniaid ki kynhun shimet hynrei ka jaka, ka hospital kan dei beit ha ka jinglong trai ka sorkar bad kim lah ban knieh ia ka.

Ula ong ba ka jingsiew ruh ia kiba leit pule kiba ioh na ka bhah ka sorkar, yn iarap ka sorkar kumjuh kumba leh ha ka Shillong Medical College, ha kaba ki samla pule kin siew tang 30 hajar tyngka bad kaba sah yn buria ka sorkar.U Conrad ula ong ba ha ka jingshisha, ka sorkar ka kwah ban pyniaid ia baroh ar tylli ki medical college hynrei ka shem jingeh palat ban ioh ia ki nonghikai.Shwa ia kane, ka kong Ampareen Lyngdoh ka Myntri ka tnad ka koit ka khiah, ka la ong ba tang ha Shillong Medical College na bynta 50 ngut ki samla pule, la donkam haduh 97 ngut ki nonghikai bad ka jylla kam pat don ki doctor ban pyndap.Hynrei ka la kyrmen ba ka Tura Medical College kan treikam noh ia ka klas ha 2026.Ha ka jingiatai ia kane ka mat, la shim bynta lang da ki MLA kynthup u Rupa Marak, ka Miania Shira.