Ki nongialam ka National Peoples’ Party (NPP) hynne ka sngi ki la pdiang sngewbha ia jingwan pyniasoh u MP barim ka Manipur u Lorho S Ploze sha ka party hadien ba ula mih noh na ka Naga Peoples Front (NPF). Ia une u MP barim ka Manipur, la pdiang sngewbha da u National President ka NPP u Conrad K Sangma uba dei ruh u Myntri Rangbah ka jylla ha ryngkat ka jingdonlang u State President u bah Prestone Tynsong, u bah Sniawbhalang Dhar, ki MLA, ki MDC bad kiwei de ki dkhot nongkitkam ka party ha ka jingialang ba long ha ophis treikam ka NPP. U Nongialam ka NPP u Conrad haba kren ha kane ka sngi, ula pynpaw ka jingsngewkmen halor ka jingwan pyniasoh u Lorho uba dei uwei na ki nongialam ba radbah ha Manipur. U Conrad ula ong ba u Lorho udei uwei na ki nongialam uba iar mynsiem bad udei u briew uba lah ban pdiang da baroh ki jaidbynriew namar ba u long uba khuid bad uba shai ha ka rukom treikam.
“Ka jingwan pyniasoh u Lorho kan wanrah ka jingkylla ha ka sain hima sima ha Manipur bad ia kane ngin sa iohi ha ka ilekshon ha u snem 2027 ha Manipur,” ong u Conrad bad ula bynrap ba ka kynhun treikam ha Manipur ka la trei shitom bha ban pynkhlain ia ka party. Katba na ka liang u Lorho ula pynpaw ka jingsngewkmen ba ula lah ban don bynta lang bad kane ka party kaban long ka rynsan ban ieng ban kren na bynta ki paidbah. U Lorho ula ong ba ha ka jinglong MP ha u snem 2019-24, u don ka jingkhmih lynti ba kum u dkhot ha Iing Dorbar Thawain ka ri , un lah ban noh synniang shibun na bynta ki paidbah hynrei kaba sngewsih ka long ba ynda la poi ha Iing Dorbar ki hap ban kren kum ki riew shimet bad bun sien ka sur jong ki ym ju iohsngew namar don tang wei ar ki MP kiba mih mihkhmat na ki jylla barit.
“ Ngi don wei ar ngut ki MP kiba mihkhmat na ki jylla barit, bad haba ngi kren ngi hap kren kum ki riew shimet bad ki jingkren baroh ki la shu ngam jyllop bad ym donlad ban pynsngew sha kiba bun namar ba ngi mihkhmat na ki party barit ym don ba khein snep ia ngi bad ki jingkren ki la shu jah ha lyer,” ula ong. Ha shwa kane, ka NPP ka la plie pyrda ruh ia u motdur jong u Purno A Sangma (Bam kwai ha Dwar u Blei) uba dei u nongseng jong kane ka party hakhmat ka ophis treikam ka party.
You may also like
-
Ka jingphet seng bad jingshah thied kinongïalam ki dawbah jingtlot ka Congress
-
Ka pateng mynta ka dei ban pynneh ia ka jingstad ba la ai ki kpa tymmen: Kong Deity Majaw
-
Palat sanspah ki dieng la pom, ka Project Shillong Ropeway kan iaid shakhmat
-
Kurup drok heroin ba T.7 lak ki pulit na 2 ngut samla
-
Ngi tip la ka bor ka buit ha ka saiñ pyrthei, kyrmen ngin poi sha ka jingjop:Prof. Batskhem