Iasoi ka MSSDS bad ka Jaceex ban jinghikai bad ai kam ia ki samla ha Japan

Da ka jingshimkhia ban pynioh kam ia ki samla ka jylla, ka Meghalaya State Skill Development Society (MSSDS) ka la iasoi ia ka Memorandum of Understanding (MoU) bad ka Jaceex Ventures LLP ban plie lad ia ki samla ka Meghalaya ban leit trei ha ri Japan lyngba ka prokram jong ka Jaceex’s kaba la tip kum ka Youth4Japan.Lyngba kane ka jingiateh kular, ka Jaceex Ventures, kaba dei ka kynhun NSDC kaba la ioh jingithuh, kan ai jinghikai bad ban buh nongtrei ia ki samla ba la tbit na Meghalaya ha bun ki liang kum ki nongsumar ia ki tymmen, ka rep ka riang, ka jingpdiang sngewbha ia ki nongwan kai, ka jingshakri ha ka rukom sam ia ki jingbam bad ban niah kali.Ka MSSDS kan ai ia ka jingkyrshan pisa haduh T.50,000 ia ki samla ban pynduna ia ka jingsiew ha ka jinghikai bad pynthikna ban wan iashim bynta bun ngut.

Ha ka MoU la ban jur ruh ba dei ban don ka rukom thungkam kaba khuid ba suba, ka jingpeitngor ia ka bha ka miat bad ka jingtreikam kaban neh slem ha kaban kyrshan ia ki samla kiba leit trei shabar ri bad la khmih lynti, lyngba kane ka jingiatreilang kan thaw ia ka lynti kaba skhem bad kaba neh na ka bynta ki khynnah samla ha ka jylla ban ioh ia ki kam kiba bha shabar ri.

Ki samla kiba la shah jied kin hap ban pyndep ia ka jingai jinghikai kaba janai, kynthup ban nang ia ka ktien Japan haduh ka kyrdan N4, ka Cultural Orientation, ki jinghikai pyntbit shuh shuh bad ka jingpynkhreh ha shwa ban mih. Nalor kane, ki samla kiba la shah jied kin ioh ia ka kontrak ban treikam ha ri Japan ha kaba ka jingsiew shibnai kan long hapdeng T. 1.1 haduh T.1.2 lak, bad lada trei palat ia ka por yn siew tam ryngkat ka jingkyrshan ia ki jaka sah.Ha kaba ia dei bad kane ka sienjam, ki ophisar ki la pynpaw ba kane ka sienjam kan iarap ban shimkhia halor ka jingkyrduh kam ki samla bad ka jingbym ioh ia ka kam ba biang hapoh Meghalaya.