Ryngkat ki kyndon thungkam ia ki trai shnong

Ki Nong shongshnong ka Nonghali East Khasi Hills hynne ka sngi ki la ai ka jingkyrshan ba pura ia ka jingtyrwa ban buh ia ka Integrated Municipal Solid Waste Management Facility ha kane ka jaka theh niut katkum ka juk saian mynta.Ia kane la pyntip da u Sordar ka shnong Nonghali u Bah Hanboklang Mynsong hadien ba wai ka jingpynshai paidbah lane ka Public Hearing ba la pynlong hynne ka sngi ha Nonghali. Haba kren sha ki lad pathai khubor u Bah Hanboklang ula ong, ka Public Hearing ka dei na ka bynta ka Project Integrated Municipal Solid Waste Management Facility ka long kaba jop namar ym shym la don satia kano kano ka jingpynsngew ba pyrshah na ki trai shnong bad ki trai jaka.

U la ong, ba ki nongshong shnong ki la pynpaw ia ki katto katne ki kyndon ba kin ai ka jingkyrshan kynthup ka Sorkar ka dei ban pyntreikam ia ka Project kumba la pynshai bad kular ka juk stad saian. “Ka Shnong ka dawa ban pyniasoh surok, ka bording ba biang bad kiwei ki jingdonkam hapoh ki jaka ban treikam ka project” la ong u Bah Hanboklang.“Ka Sorkar ka la kular ban ai kam ia ki trai shnong, ba dei ka sienjam ba pdiang na ka bynta ki nongshong shnong” ula ong.

U Sordar ula pyntip ba ka Shnong ka la dawa ban siew bai lutksan ba kyrpang ia ki trai jaka, haba buh hakhmat ia ka jinglong kongsan jong ka project bad ka jingkitkhlieh ba la shim da ka Shnong.“Ngi sngew ba ka Sorkar Jylla ka dei ban mynjur ban siew ia ka bai jaka kyrpang namar ka shnong ka la tynrong ha lade ia ka jingkitkhlieh ba kongsan bha, ban shakri ia ka district baroh kawei” ula pynpaw.Haba ia dei bad ki katto katne ngut ba pyrshah, u Sordar ula kyntu ia kito kiba pyrshah ia ka project ba kin phah da ka jingthoh ia ka jingsngewkhia jong ki sha ka Dorbar Shnong, khnang ba ka Dorbar kan shong ban shong bishar bad ban leh eiei.Haba kylli, u Sordar ula ong ba ka jaka ba la tyrwa ban pyntrei ia ka project ka dei jong ka Dorbar Shnong bad ka pisa ba ioh lum na ka project, yn sa pyndonkam ha ka rukom kaba dei.