Pynrem ka Sur Bri U Hynniewtrep ia ki kam thombor bad pyniap briew

Ka Sur U Paidbah ka Bri U Hynniewtrep hynne ka sngi ki la mih paidbah ha madan Malki ban pynrem jur pyrshah ia ki runar kiba nud ban thombor ban shim ia ka jingim  briew. Ha kane ka jingialang la wan iashim bynta da ki kynhun nongialam sengbhalang bapher bapher kynthup ka KSU, HITO, HNYF, JSU, HYC, FKJGP, KHNAM nalor kiwei de. Ki nongkren haba kren ha kane ka sngi bun ki la kynthoh ba ka jingmih ki jingjia ba shyrkhei ha kine ki sngi ka dei namar ba synjor ka ain bad ka jingjur jong u droks nalor kiwei de. Haba kren ha kane ka sngi, u nongialam ka Sur u Paidbah u bah Thomas Passah ula ong ha ki lai snem ki la don ki jingjia ba sngew shyrkhei namar la jan man ka por la shu lap metiap na ki um ki wah, ki khlaw ki btap bad kane ka la pynshong syier ia ki nongshong shnong ka jylla.

Ula kyntu ia ka sorkar ba kadei ban pyrkhat thymmai ban pynkhlain ia ka ain ban pynshitom da kaba tyngeh ia ki runar kiba donkti ha kino kino ki kam thombor. Katba na ka liang ka kong Joplyn Shylla ka nongialam ka Sur u Paidbah, ka la ong ba ka jingdon jong ki website ba pyni ia ki phlim dakaid ka la nang pynkynrei ia ki jingsniew ha ka imlang sahlang. Ka la ong ba na ka liang ka Sur u Paidbah ka la dei ban leit ai da ka jingthoh sha ka sorkar ba kadei ban pyndam noh ia kum kine ki website kiba isait met. “ Ki khynnah ba shiphew snem ruh ki iohi ia kane ka website ba pyni ia ki dur ne ki video bym long bad ka la dei ka por ba ngin leit ai jingthoh sha ka sorkar ba kadei ban pyndam noh ia kine ki website,” ka la ong. Nalor kane, ka la ong ba mynta ki la mih sa ki jinglehkai (Games) ban lehkai kumno ban pyniap briew ban sdien phasi. Ka la kyntu ia ka sorkar ka dei ban kitkhia ban pynduh ia kum kine.

U nongialam ka HYC u samla Enlang Sawian ula pynpaw ka jingsngewkhia namar ba ki kam thombor pyrshah ia ki kynthei bad ki khynnah ha ka jylla ka la jan ia ryngkat bad ki nongbah ha Uttar Pradesh Bihar bad ha kiwei ki jylla. Ula ong ba ka jingshlur ki riewsniew ban nud ban thombor kadei namar ba pheil ka tnad kam pohiing ka sorkar jylla. U bah Enlang ula ong ba kum u nongialam seng bad kum u nongiasaid ain, ula iohi ba kiba bun ki nongleh kam sniew haba ki shah kem , tang ha ki katto katne bnai ki la ioh jamin noh. Ula ong ba tang ha West Khasi Hills, ka jingshah thombor ki khynnah kiba dang hapoh 16 snem ka jur bha, hynrei kaba sngewsih ka long ba ha jylla kim don ia ki nongiasaid ain paidbah ban pyntikna ba ki runar kin shah pynshitom tyngeh. Na ka liang ka Sur u Paidbah ka Bri u Hynniewtrep ka la rai ba kan sa phah da ka jingthoh bad kan sa leit ban iakynduh ia ka sorkar ban pynsngew ia ki mat ba la iakren ha kane ka jingialang.