Bun ba la wan tyrwa jingshaniah hadien ba ki iohi ia ki kam ba nga trei : Wailadmiki Shylla

Ka National People’s Party, Jowai Block hynne ka sngi ka la pynkup burom ia u MLA ka 2-Jowai u Wailadmiki Shylla halor ka jingshah jied jong u kum u myntri ba thymmai ka sorkar Jylla ba peit ia ka tnat Sport and Youth Affairs, ka tnat Health and Family Welfare bad Home (Passport).

Ia kane ka jingialang pynkup burom la pynlong ha Indoor Hall ka shnong Chutwakhu Jowai, ha kaba ki nongkyrshan jong u na ki unit bad ki shong bapher bapher, kumjuh ki tnat treikam bapher bapher ka NPP kila wan ban ai khublei ban pynkup burom ia u, ha ryngkat ki kyntien kyrkhu kyrdoh bad kitbok kitrwiang ia u ba un dang lah ban trei kham bha shuh shuh ia ka constituency bad ka Jylla hi baroh kawei.

U Wailadmiki Shylla haba ai jingkren u ong ka jingkhia jong ki Ryndia tlem ba la pynkup ha tyrpeng jong u hynne ka sngi ka pyni ia ka jingshaniah ha u ba un shakri ia ka jylla baroh kawei ha kaba ula phai dien bad pynsngew ruh ia ka jingiaid lynti jong u na ba sdang kum u shakri jong ki paidbah ka Constituency, haduh ba un ioh ban bat ia ka shuki myntri ha ka sorkar Jylla.

U khot u wer ia baroh ki paidbah ba kin kynmaw ia u ha ki jingduwai khnang ba un ioh ka met ba shait ba khlaiñ bad lah ban shakri ia u paidbah khamtam ba mynta ula kit ia ka lyngkor ba iar ha kaba u hap ban peit baroh kawei ka Jylla.

U ong ruh kum u MLA ba hap peit lang ia ka jaka sor kum ka Jowai bad shnong nyngkyndong, u shem ba ha (Urban) Jowai ka long eh bha ban ioh ka jingshaniah na ki, hynrei da ka jingtrei shitom jong u ban wanrah ia ka roi ka par, kumba long mynta la bun ki briew ba wan tyrwa jingshaniah ha u, ha kaba ki la pynsngew ba dei lyngba ka jingiohi jong ki ia ki kam ba u trei, kumta kin iai donlang bad u ha ki snem ban 2028.

Ha kajuh ka por u kyntu ia ki paidbah ba kin don ka mynsien iatreilang.