Pynher lama bad bam smai ki samla pule MBBS Shillong Medical College

Kum shibynta jong ka jingpyniaid shakhmat ia ka jingtreikam, hynne ka sngi ka Shillong Medical College (SMC) ka la pynher lama bad la pynbam smai ia ki samla pule MBBS ba nyngkong ha ka jingialang ha Pasteur Hills, Lawmali Pyllun. Kane ka prorkam ka dei ka jingsdang ia ka jingtreikam jong ka Shillong Medical College, ia kaba la wan ban donlang u Chief Secretary ka jylla u Dr. Shakil P. Ahammed, u Commissioner & Secretary ka Koit ka Khiah u Dr. Joram Beda, ki heh ophisar sorkar, ka Director jong ka SMC ka Dr Nicola Carissa Lyngdoh Iangrai bad kiwei kiwei. Da ka jingsdang pyntreikam ia ka Shillong Medical College, mynta ka jylla Meghalaya kala ioh sa 50 tylli ki seat pule MBBS nalor ka jingioh lypa ia 93 Seat kaba la bhah da ka sorkar pdeng. Ka Dr. Nicola Carissa Lyngdoh Iangrai, ka Director Banyngkong eh jongka Shillong Medical College, kala ong ba kane ka jingialang kadei kaba kmen bad ka khyllipmat kaba sngewsarong bha na ka bynta ki nonghikai bad ki nongtrei.
“Ka dei ka sngi kaba n sah ha ka histori ia ngi baroh lang. Kaei kaba sdang kum ka jingiohi jngai ban tei ia ka medical college ha Meghalaya mynta kala lah ban urlong shisha” ong ka Dr. Iangrai.Ka la pynshai ba kane ka jingialang kadei kum shi bynta jong ka ‘Foundation Course’, kaba iaid ryntih lang bad ki jingbthah jongka National Medical Commission (NMC) kaba pynleit jingmut ha ka jingling jingman, ka akor ka burom, ka jingpyniadei bad khamtam ka jingdon ia ka jingiadei hapdeng ki doctor bad ki nongpang. Kala pyntip ba ka college kala pynkhreh ban sdang noh ia ka jingshim klas kaba nyngkong ia ki samla pule MBBS ha ka 14 tarik u Risaw bad ha ki snem ban wan ka jylla kan sa pynmih bun ngut ki doctor kiba thymmai kiba la pyntbit hi napoh ka jylla Meghalaya. “Kam dei satia tang ka jingsdang ia ka college hynrei kadei ruh ka jingsdang jong ka jingpynkhlain ia ka rukom ai jingshakri ha ka koit ka khiah hapoh ka jylla” ka la ong. Ha kane ka thup pule kaba nyngkong kan kynthup ia 50 ngut ki samla kiban pule ia ka MBBS kiba kynthup 42 ngut na ka Khasi-Jaintia bad Garo bad 8 ngut na ka bhah hapoh ka ri ne All India Quota.
Kala ong ruh ba bun ki samla pule kila jied ia ka Shillong Medical College namar ba ka ailad ia ki ban pule kaba don hajan iing bad ha ka dor kaba biang bad ka rukom shim ia ka bai pule ka long kaba lah ban ianujor bad ka RIMS, Assam Medical College bad kiwei kiwei ki jaka pule kiba don ha ka thain. Kala ong ba kane kadei ka kabu ia ki samla pule ban pule ia ka ‘Medical’ khamtam ia kito ki bym kot bor ban leit pule shabar ka jylla. Ka college kala dep ban thung ia ki nonghikai ha ki 21 tylli ki tnad pule kumba la bthah bad bud ryntih ia ki kyndon jong ka NMC ban sdang ia ka jingpule jong u snem banyngkong jong ka MBBS.