Pynher syrngiew u bom IED ba 4 kilo ha Umsning, lap ksai ki pulit ia ki runar ba donkti

Ki pulit ka Ri Bhoi District ha ryngkat ka jingdonlang ki pulit Special Bomb Squad bad K-9 team hynnin ka janmiet ki la ioh ban pynpulom noh ne defuse ia u bomb IED ba khlaiñ bor ba la buh ha kawei ka pla iong hajan ka iingsah briew bad hajan ka Meghalaya Rural Bank ha Umsning. Katkum ka jingiathuh da u Special Superintendent of Police ka Ri Bhoi District, u VS Rathore ula iathuh ha ka por 7:30 baje janmiet la ioh jingtip halor ka jinglap ia kawei ka pla iong ba la suba don bom kaba la buh hajan ka khyrdop iing jong u Bah Nehlang Lyngdoh, MLA barim ka Umsning bad hajan ka Meghalaya Rural Bank.

Ula iathuh mar ia ioh jingtip ki pulit ki la leit sha katei ka jaka ban tohkit bad ban pyntip ia ki pulit ka Special Bomb Squad bad ka kynhun K-9 ban jurip bad khynra ia katei ka pla bad hadien ka jingkhynra la lap shisha ba dei u bomb IED ba dang treikam bha u ba don kumba 4 kilo 710 gram bad kumta mar mar hi ki pulit ki la khang lad noh ia ka iaid ka ieng ki paidbah ha katei ka thain bad ban sdang ban pynlip ne pynduh bor ia utei u bom ba khlaiñ bor bha bad dei haduh 11 baje mynmiet ki la lah ban pynurlong ia ka jingpynduh bor ia u tei u bom.

Shuh shuh ruh, u Rathore ula pyntip ba la rah noh ia u tei u bomb sha thanat ha Umsning Police Station bad la tohkit bniah halor ka jingsuba donkti ki riew runar ba leit buh ia katei ka pla ba don u bomb hajan ka iingsah jong u Bah Nehlang Lyngdoh bad na ka liang ki pulit ki la lap ksai ia kito kiba donkti ban buh ia u tei u bom bad shen hi kin sa leit kem ia kito ba donkti.